Un collectiu de personalitats restacadas a l’occitanisme a publicat un manifèst que reclama una representacion mai equilibrada e una màger visibilitat de las femnas dins las activitats e las estructuras del movement occitanista. Lo tèxt, publicat lo 6 de febrièr de 2025, soslinha l’importància de la paritat e de la mixitat dins un encastre sòciopolitic marcat per l’aument dels discorses reaccionaris.

Lo manifèst defend qu’una promocion activa de la participacion femenina dins la vida publica contribuiriá a refortir lo modèl occitanista, basat sus de valors coma lo paratge, la convivéncia e la larguesa. Remembra tanben la tradicion progressista de figuras istoricas occitanas coma las trobairises, Olímpia de Gouges o Alienòr d’Aquitània, aital coma las tradicions pirenencas que permetián l’eiretatge egalitari entre òmes e femnas.

Demest las proposicions concretas, lo manifèst prepausa:

• L’alternància dins las intervencions publicas a las assembladas.

• La seleccion d’intervenents segon de critèris de paritat o, almens, de mixitat.

• L’eleccion de binòmis mixtes encargats de decision e d'animacion.

• La constitucion de juradas paritàrias pels prèmis literaris e artistics.

• La paritat dins l’eleccion de responsables d’associacions e institucions.

• Lo finançament de sits web consagrats als trabalhs femenins e feministas.

• La commemoracion annadièra del 25 de junh a Tolosa, en omenatge a las femnas occitanas a l’ocasion de la mòrt de Simon de Montfòrt.

• Una jornada editoriala cada an per promòure las òbras d’autoras occitanas o d'especialistas en questions de genre.

Lo manifèst es sostengut per de nombrosas personalitats del mond cultural e academic e tanben li dona supòrt Jornalet. Lo tèxt convida las personas e entitats a jónher la crida, en contactant Martine Boudet.