Bandièra01 capçalera  1180x150: Novestivada

Actualitats

Fotbòl. Liga 1: Lo títol remandat a la darrièra jornada

Liga 2: Los occitans demòran sens enjòc

Lo public amassat sus la Plaça de la Comèdia de Montplehièr daissèt escapar son gaug
Lo public amassat sus la Plaça de la Comèdia de Montplehièr daissèt escapar son gaug | Hélène Mandroux

Serada tenduda per la 37a jornada: a Montpelhièr, tot èra parat per festejar lo títol del MHSC. Mas París se daissèt pas empatenar, e ganhèt sens dificultat a Rennes (3-0), en conservar totes los sieus espers. Pels montpelhierencs, calguèt batalhar fins al temps adicional. Las caras desfiguradas per la pression. La paur de ganhar, aquò existís dins totes los espòrts, e al moment de portar l'estocada, maitas esquipas tròp joves se son ja daissadas colhonar. Los òmes de René Girard poguèron pas produsir de jòc. Paucas d'ocasions, e la menaça totjorn reala d'Eden Hazard e dels sieus companhs lilleses. Mas Giroud a una pauta magica: a la 94a minuta, se trapa un ballon de Stambouli balançat sens conviccion pels aires, d'un contaròtle perfècte accelera lo long de la banda esquèrra, e de l'arma absoluta de l'atacant, lo cèntre en retrach, balha la victòria a Karim Aït-Fana. Lo public amassat sus la Plaça de la Comèdia daissèt escapar son gaug, longament, pendent que d'unes jogadors ploravan, demorats sul camp una estona. Un rampèl en Aussèra sufís, ara, per tornar amb lo títol de campion.


Bordèu europèu!
 
Se fasem lo compte de totes los ponches perduts pels Girondins de Bordèu, vesem plan que la còla de Francis Gillot podiá pretene a plan melhor. Acaban la sason lançats, amb un vam que se podiá pensar que pas jamai tornariá animar los marin e blancs ongan. Verai, arser la performància dels Girondins foguèt pas gaire estrambordanta. Mas aquò rai, un penalti balhèt a Gouffran la possibilitat de faire passar sa còla devant Rennes e Sant Estève, totes dos entrepachats per París e Nancí. L'atacant bordalés, en granda partida responsabla de la bona debuta d'annada 2012 del sieu club, se manquèt pas. Los Girondins s'impausan sens esbelugar, mas son mestres de lo lor avenir, ara. Una victòria a Sant Estève dimenge lor balhariá la qualificacion en Europa League. Qual s'o auriá cresut fa quinze dias?

 
Tolosa abandona sons espers
 
A un moment, lo TFC podiá agachar en naut del classament, cap las plaças de Champions League o al mens de C3. Sembla complicat, ara, sustot dins la dinamica on se tròban. Dins una partida sarrada e sens gaire possibilitats de gòl, los dijoneses trapèron primièrs lo camin de la gàbia, pel cap de Meité aprèp un còp de recanton (28a minuta). La responsa tardèt pas gaire: a la 44a minuta, lo jove Soukouna marquèt son primièr gòl de L1, per sa primièra titularizacion. Lo marcador cambièt pas mai, mercés a una bona performància d'Ahamada dins la gàbia tolosenca. Pòdon encara somiar, mas ara son tres còlas davant, per se qualificar en C3. 

 
Marselha se desvelha tard
 
L'Olimpic sembla enfin sortir de sa letargia e tornar trobar una enveja e una reussita qu'avián perdut dempuèi la debuta de l'annada. Es un pauc tard, solide. Contra Aussèrra, còla d'una granda feblesa e encara mai pregondament en crisi, l'afar faguèt pas un plec. I aguèt pas vertadierament de partida: la bala, confiscada pels marselheses, semblèt escapar als borguinhons. A la mièja ora de jòc, Fanni passèt devant tota la desfensa per dubrir la marca. La confirmacion venguèt a la 54a minuta, amb un gòl d'Azpilicueta, que confirma la siá importància dins la còla provençala. Per acabar amb los espers de l'AJA, Gignac clavèt un tresen gòl (son primièr personal, aquela sason) a la fin del temps reglementari. L'OM joga pas res mai, mas la victòria a casa es bona, quand n'i an pas gostat dempuèi meses.
 
 
Niça, encara menaçat per la L2
 
Niça capita pas de quitar las plaças perilhosas. Contra Evian, entamenèron la partida del biais piéger que i aguèsse: Pejcinovic enganèt son portièr Ospina, tanlèu lo primièr quart d'ora. Sentissiá a la maissanta serada, sustot que los alpencs, encoratjats per aquela dubertura inesperada, enforcèron alara la pression. Mas com sovent, l'òme qu'aviá marcat dins la siá gàbia capitèt d'egalizar (34a minuta), d'una polida volada. Los niçards, que poguèron pas passar davant l'ETG malgrat maites ensages sens reussita, pèrdon un parat de s'acestar. Demòron a un punt de la baissada, mas ara an cinc còlas darrièr. Una victòria de Tolosa sus Ajaccio, o del PSG sus Lorient (los dos clubs an encara interests a prene ponches) bastariá per assegurar lo manten als aglons.
 
Los resultats:
 
Montpelhièr – Lilla 1-0 ; París – Rennes 3-0 ; Ajaccio – Lion 1-1 ; Nancí – Sent Estève 3-2 ; Bordèu – Lorient 1-0 ; Dijon – Tolosa 1-1 ; Niça – Evian Thonon Gaillard 1-1 ; Marselha – Aussèrra 3-0 ; Brèst – Valencianas 1-0 ; Can – Sochaux 1-3
 
 EsquipaPtsJGRPBpBcDif
1Montpelhièr HSC 79 37 24 7 6 66 33 33
2 París SG 76 37 22 10 5 73 40 33
3 LOSC Lilla Metropòli 71 37 20 11 6 68 38 30
4 Olimpic de Lion 64 37 19 7 11 61 47 14
5Girondins de Bordèu 58 37 15 13 9 50 39 11
6 AS Sant Estève 57 37 16 9 12 47 42 5
7 Stade Rennais 57 37 16 9 12 48 44 4
8Tolosa FC 56 37 15 11 11 37 32 5
9 Evian TG FC 50 37 13 11 13 54 54 0
10Olimpic de Marselha 48 37 12 12 13 45 40 5
11 AS Nancí Lorena 45 37 11 12 14 37 44 -7
12 Valencianas FC 40 37 11 7 19 37 49 -12
13OGC Niça 39 37 9 12 16 34 42 -8
14 FC Lorient 39 37 9 12 16 34 47 -13
15 FC Sochaux-Montbéliard 39 37 10 9 18 39 60 -21
16 FC Brèst 38 37 7 17 13 30 38 -8
17 SM Caen 38 37 9 11 17 38 56 -18
18 AC Ajaccio 38 37 8 14 15 38 61 -23
19 Dijon FCO 36 37 9 9 19 38 58 -20
20 AJ Aussèrra 34 37 7 13 17 45 55 -10



Liga 2: Los occitans demòran sens enjòc
 
Marrida serrada pels occitans de L2: fòra d'Arle-Avinhon, totes perdèron. Mas lo manten es assegurat pels arlatencs. Clarmont daissa escapar la pojada, definitivament ara: l'an que ven Bàstia, Rems e Tròias jogaràn al primièr nivèl
 
Clarmont s'esbonís en Bretanha
 
Clarmont, distanciat dins la correguda a la L1, a pas mai lo cap al jòc. Divendres, l'EA Guingamp daunegèt sens partatge los auvernhats. Triguèron pas gaire a portar lo dangièr davant la gàbia de Farnolle, fins a dobrir la marca a la mieja ora de jòc. Clarmont ensagèt de reagir, timidament. Mas sens la conviccion qu'auriá calut, e a la 54a minuta Mandanne doblèt l'escart. L'espèr semblèt pas quitament tornar al gòl de Dembele (81a minuta). Pr'amor caliá ganhar, a tota fòrça, per poder encara esperar. Mas dempuèi qualques partidas, lo Clarmont Foot n'a pas mai lo nivèl per pujar. Charrier o provèt, e confirmèt la victòria dels bretons a la 83a minuta. Es una granda decepcion, solide, per Clarmont que demorarà en L2 l'an que ven.

 
Arle-Avinhon enfonsa Mètz...
 
Es un duèl decisiu per baissar pas, que se debanèt al Parc dels Espòrts. Après una minuta de silenci per remembrar Jules Bocandé (que foguèt un simbol de la còla lorena), l'ACA entamenèt aquel encontre tan important amb fòrça vam, e pauc de reussita. Ayasse desliurèt enfin lo public provençal, avant la pausa. Tremolèron pas, après: malgrat doas accions de las dangierosas per l'FCM, l'ACA mestregèt la partida, totjorn. Pòdon saborar lo manten, ara, e esperar la sason que ven amb de tranquillitat. 

 
... e Mónegue balha la L1 a Tròias
 
Pas mai d'espers a Mónegue mas un bèl solatjament, ara que lo manten es confirmat. E una punta de grases, benlèu. Qu'amb la segonda partida de sason qu'an acomplida, la catastrofica primièra mitat prend la cara d'un bolet que rosegan, e daissa pensar que tots los sòmis èran possibles, ongan. Divendres, se poguèt veire una partida plasenta. Mónegue o ensagèt tot, sens capitar a trobar la falha. E ongan Tròias a d'espatlas solidas. L'emportèron 0-2, e se ganhan lo tornar en L1, gavidat pel girondin J.M Furlan (originari de Senta Fe la Granda, entrainèt lo FC Liborna-Saint Seurin fins a 2004). Mónegue pòt arcastar: d'aver pas marcat arser, e fòrça mai qu'aquò.

 
A Lens com a Istre, son ja las vacanças
 
Foguèt una partida d'una granda pauretat e pauc animada: cap d'accion vertadièra en primièra tempsada, e pas gaire mai en segonda. Mas Lens faguèt lo mestièr e assegurèt son manten, amb lo gòl de Pollet (74a minuta). Per Istre la desfacha cambia pas res. Demòran dins la pança, sens pression ni espers per la darriera partida.

 
Los resultats:
 
Bàstia – Nantas 2-1 ; Amians – Rems 0-2 ; Mónegue – Tròias 0-2 ; Guingamp – Clarmont 3-1 ; Sedan – Châteauroux 2-0 ; Tors – Le Mans 2-1 ; Lens – Istre 1-0 ; Angièus – Boulogne 2-1 ; Laval – le Havre 0-2 ; Arle-Avinhon – Mètz 1-0 

 EsquipaPtsJGRPBpBcDif
1 SC Bàstia 71 37 21 8 8 61 35 26
2 Stade de Reims 64 37 18 10 9 53 36 17
3 ESTAC Tròias 61 37 16 13 8 43 35 8
4 Sedan 56 37 14 14 9 54 44 10
5Clarmont Foot 55 37 14 13 10 46 39 7
6 Tours FC 55 37 15 10 12 43 42 1
7 EA Guingamp 52 37 14 10 13 44 43 1
8 FC Nantas 51 37 14 9 14 50 40 10
9 Angieus SCO 51 37 13 12 12 44 42 2
10AS Mónegue FC 49 37 12 13 12 39 47 -8
11FC Istre 48 37 12 12 13 45 44 1
12 Châteauroux 48 37 14 6 17 38 52 -14
13 Stade Lavallois 47 37 12 11 14 46 48 -2
14 RC Lens 47 37 12 11 14 41 47 -6
15AC Arle Avinhon 47 37 10 17 10 33 40 -7
16 Havre AC 44 37 10 14 13 35 34 1
17 Le Mans 44 37 11 11 15 38 39 -1
18 FC Mètz 41 37 10 11 16 29 43 -14
19 US Boulogne CO 36 37 7 15 15 39 45 -6
20 Amiens SC 26 37 4 14 19 29 55 -26
 
| MHSC

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
4.

Totes los Occitans al sosten de Montpelhièr !!!!!!!!!!!!

  • 1
  • 0
PJM bordèu
3.

ai ai. quina vergonha...
desolat per la dèca ; serà adobat lo còp venent.

  • 1
  • 0
Matieu Castel Amians
2.

STADE BRESTOIS e pas "FC Brest" !!! Vos lo tornarai ramentar a cada còp !

  • 2
  • 0
garric
1.

Un brave marcé per l'analisi e los tablèus...

  • 5
  • 0

Escriu un comentari sus aqueste article