Los 24, 25 e 26 de julhet que venon, al ras de Rodés, la vila de Sebazac aculhirà una Estivada occitana reviscolada. Ja, l’an passat, la Nòv’Estivada aviá aculhit a l’entorn de 4000 festenalièrs venguts dels quatre caires d’Occitània per participar a la relança de la dinamica e a la reflexion a l’entorn de la forma que lo prendrà lo futur festenal interregional occitan.

Ara que lo nom Estivada aperten oficialament a una associacion occitana, dobèrta a totas las bonas volontats, avèm l’escasença istorica de nos crear lo luòc d’amassada annadièr e central que fa tant sofracha a totes los aparaires, actors e aimadors de la lenga nòstra, en totas sas varietats.

Las taulas redondas del forum de 2024 an dessenhat los contorns d’un festenal popular e militant d’ambicion interregionala, granda fièira de la creacion artistica, culturala, sociala e intellectuala occitana.

L’Estivada representa tanben uèi una Zòna A Defendre (ZAD) fàcia a las atacas e al mesprètz que cèrts decididors alimentan. La qualitat e la capitada de l’eveniment seràn importantas per far recular los prejutjats e mostrar la riquesa, la vivacitat e la legitimitat d’una cultura occitana contemporanèa e originala.

L’Estivada 2025 e l’associacion La Gardarem an besonh de l’ajuda e del sosten de totas e totes. Aderissètz per 10 èuros a l’associacion[1] e sustot, venètz descobrir, encontrar e festejar amb nosautres los 30 ans de l’Estivada los 24,25 e 26 de julhet a Sebasac![2] Vos i esperam nombroses e valents!