Los òmes de Glèisa benefícian d’una diversitat de revenguts e d’avantatges, que vàrian considerablament en foncion de lor reng e de lor foncion dins la ierarquia catolica

L’argent es pas un subjècte tabó dins la glèisa catolica, mas las diferéncias de remuneracion entre sos membres pòdon èstre notablas, çò rapòrta Sud-Ouest. Mentre que lo papa percep pas cap de remuneracion, los cardinals, evesques e curats an de salaris mai o mens nauts segon lor estatut.

Lo salari del papa

Lo papa Francés, segon l’exemple de sos predecessors, tocava pas cap de salari. Expliquèt un jorn pendent una entrevista: “Ganhi pas res. Res del tot”. Pasmens, benefícia de lotjaments gratuits e d’una còla de collaboradors pagada pel Vatican, çò que li permet d’aver pas de despensas personalas. “Me noirisson e quand ai besonh de quicòm, o lor demandi”, çò apondèt.

Malgrat que lo papa recépia pas de salari, pòt acceptar pasmens de presents e de revenguts suplementaris, sustot pels dreches d’autor. Per exemple, Beneset XVI toquèt entre 4 e 5 milions d’èuros per sos libres. Sovent, aqueles fonzes son reversats a d’òbras de caritat, coma o foguèt la venda d’una Lamborghini en 2018 per 715 000 èuros, dont lo produch foguèt utilizat per ajudar los mai desprovesits.

Lo salari dels cardinals

Un cardinal percep en mejana 4500 èuros per mes. Pasmens, a causa de la crisi financièra de la Glèisa, lo papa Francés decidiguèt de reduire los salaris dels cardinals, los fasent passar de 5000 a 4500 èuros dempuèi 2021. En mai d’aquò, d’avantatges coma la presa en carga de lors còstas personalas son estats suprimits. Lo Vatican compta actualament 252 cardinals, mas sols los de mens de 80 ans pòdon estar elegits papa (137 a l’ora d’ara).

Lo salari dels evesques

Los evesques, coma los cardinals, fan pas vòt de pauretat. Tòcan un salari de 3000 èuros per mes, mentre que los archevesques caps de dicastèri ganhan entre 3000 e 4000 èuros. Aquelas figuras religiosas son tanben las principalas fonts de promocion per venir cardinal.

Lo salari dels prèires

Los prèires, sovent considerats coma d’òmes de vocacion, an un salari fòrça mai modèst, d’entre 1000 e 1200 èuros per mes. Lor remuneracion proven principalament dels dons e ofrendas per las messas, baptismes e maridatges. Malgrat que lors condicions de vida sián relativament modèstas, son lotjats per la Glèisa, en particular dins los presbitèris. Per contra, lor budget pòt èsser fòrça afectat per las còstas de desplaçament, sustot per aqueles qu’exercisson dins las zònas ruralas.