Bandièra01 1180x150: Comuna de Tolosa

Actualitats

L’aranesa Alidé Sans cantarà l’imne occitan a la celebracion del Jorn Nacional de Catalonha

L’aranesa Alidé Sans representarà Occitània dins los actes de celebracion del Jorn Nacional de Catalonha.
 
L’acte institucional, que se farà a Barcelona l’11 de setembre de matin, farà tanben un remembre al 800n anniversari de la Batalha de Murèth e al 700n anniversari de la Querimònia d’Aran. Dins aquel sens, la joina musiciana aranesa Alidé Sans interpretarà l’imne nacional occitan amb l’accent aranés: Aqueres montanhes.
 
Sans serà acompanhada pels acordeonistas Cati Plana e Liv Hallum, per Manolo López a la contrabassa e per Mark Pulido a las campanas.
 
L’acte cèrca d’èsser tanben un gèst de solidaritat amb aquel país occitan per las inondacions patidas lo 17 de junh passat, just l’endeman de festejar la Fèsta d’Aran.
 
La jornada de l’11 de setembre d’ongan ven marcada pel procès de Catalonha vèrs l’independéncia del país. Al delà dels actes populars e oficials, de las divèrsas manifestacions revendicativas, dels concèrts e de las fièras, una cadena umana d’aperaquí 400 quilomètres travessarà Catalonha del nòrd al sud en revendicant l’independéncia. Divèreses partits e movements occitans (PNO, PÒC, Iniciativa per Occitània, Libertat!…) sostenon aquela manifestacion e quitament i participaràn.
 
La cadena umana seguirà del sud enlà pel País Valencian e del nòrd ençà per Catalonha Nòrd. En Malhòrca es previst de far una mapa umana dels Païses Catalans.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mathieu Castel Marselha
17.

#15 A tè, veguèri qu'es un opinant dau Jornalet. Seis articles son gaires polemics pasmens (e puslèu interessants).

  • 7
  • 1
Mathieu Castel Marselha
16.

#15 E cu es aqueu Josèp Lois Sans per se meritat tant d'animositat ? As agulhonat ma curiositat !

  • 4
  • 1
Cédric Rousseu Tolosa
15.

Una bona nòva qu'Occitania sia representada per una gojata amb tant de talent (e a mai manhagueta ço que gasta pas res). Per aver agut l'escasença de l'entrevistar, aquela filha pensi anira luènh que ten la qualitat matger : lo plazer de cantar.

Esperi tot simplament que i'aura pas colhons que tenon una dent contra lo seu paire e que lo gauson pas atacar de front per faire pagar a l'Alidé lo seu nom d'ostal (disi aquò en tot assumant que ieu aimi plan lo Josep Luis, que podi entendre que siaguesse pas l'amic de totun, çaquela Alidé es pas responsable del parelh d'avelana d'onte es gesida e a pas de pagar l'inimitat que certs tenon contra lo seu paire)

  • 7
  • 0
Occitània Sud
14.

#11 "Pensi que pensi e pensarè ...",
aquò que son paraulas d'una deras beròias cançons d'Alidé...,
que t'as arrestat massa ena sua persona...!
la noticia qu'ei que la joina cantaira cante, indiscutiblement!
mès, plus important enqüèra ei
qu'ei lo primièr còp qu'Occitània
participe des actes de La Diada en tot enviar una cantautora, compositora, arrangista, polinsturmentista, versionaira, arrenjaira ... e en mai ... beròia e tamb ua beròia votz!
que ges des 19 ans...
e aquò a una repercussion indiscutibla tanben en mon dera musica des joeni occitans.

Cau liéger la noticia sense subrevalorizar, as arrason,
mès qu'es cau fixar un pauc mès en la granda actualitat de la noticia, as tanben arrason.
Siam pas d'immadurs. Sò d'acòrdi!

"Pensi que pensi e pensarè" que t'as arrestat massa ena sua persona ...
sabes?? aquò ei una lectura que li correspon a la sua gran-maire
pas a quicom que pense en Occitània.

A lèu, amic, te conselhi que gaudisques dera companhia d'Alidé Sans!
Escota es joeni occitans e catalans e saja de no te pèrdre es actes de La Diada!!
Er 11 de seteme as 11:30h deth maitin, dempús de lheuar La Senyera, cantarà Alidé!
Serà transmetut per TV3 e la poderatz veir, la poderatz gaudir, en una aplicacion especiau tà portable de "imakestream".

"Canta e non patisques, non patisques per arren" ... paraules d'Alidé Sans, que cadun lieg coma li semble.
Sai cap tu, mès jo non pensi pas perder-me-la !!*!!


  • 18
  • 0
Ianic Chucnimuc Sent Ilari
13.

Alidé in! Garric out!

  • 19
  • 0

Escriu un comentari sus aqueste article