Bandièra01 1180x150: Comuna de Tolosa

Actualitats

Lo CIO a causit Tòquio pels Jòcs Olimpics de 2020

Tòquio serà la vila qu’organizarà los Jòcs Olimpics e Paralimpics de l’an 2020, en s’impausant a Istambol al vòte definitiu. La candidatura de Madrid foguèt eliminada de la lucha al primièr torn qu’avián fach los membres del Comitat Internacional Olimpic (CIO) a Buenos Aires (Argentina). La capitala japonesa èra, de fach, la favorida perque presentèt una candidatura tecnicament mai completa.


Tòquio èra la sola vila candidata qu’aviá ja organizat de Jòcs Olimpics. Aquela escasença, en 1964, permetèt que la capitala japonesa venguèsse una vila modèrna e tecnologica e que quitèsse la destruccion posteriora a la Segonda Guèrra Mondiala. Los representants japoneses soslinhavan aquela experiéncia.
 
De fach, lo CIO considerava lo projècte de Tòquio 2020 lo mai de complet tecnicament, amb d’estadis cobèrts e de desplaçaments aisits entre los diferents luòcs de competicion. S’avalorava tanben l’economia e la capacitat d’organizar qu’an en aquel país. En mai d’aquò, la vila a de bons servicis medicals, de transpòrts, de seguretat e de lotjament.
 
Un ponch negatiu èra la contaminacion de la crisi nucleara de Fukushima e l’escàs sosten popular que lo projècte aviá demest los japoneses, en dejós de 70%.
 
 
Tresena malparada de Madrid
 
Lo primièr torn del vòte deviá servir a escartar una de las tres candidaturas. Los representants de la candidatura de Madrid èran convencuts que lor vila seriá una de las doas finalistas, e pr’amor d’aquò las televisions espanhòlas anonciavan la decision finala a 22h30, en supausant que se superariá facilament lo primièr torn, e en mesestimant la candidatura d’Istambol.
 
De fach, dins lo primièr torn, Madrid e Istambol egalizèron amb mens de vòtes que Tòquio. Caliá despartir e los membres del CIO votèron, en aquel cas, solament entre Istambol e Madrid. Madrid foguèt eliminat sul pic.
 
Abans l’eleccion, los representants de las tres vilas avián fach lor darrièra presentacion davant los cent quinze membres del CIO.
 
Èran presents a l’acte almens quatre caps d’estats e quinze monarquias.



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article