Bandièra01 1180x150: Comuna de Tolosa

Actualitats

Es indignat

Lo chantaire Rodín ven de sortir son primier single en sòlo a gratis sus Internet

L’avèm auvit dins lo Còr de la Plana, vist dins las vidèos umoristicas de Ben e Rò o sus Dètz.tv, uei Rodín se lança dins una aventura en sòlo. Un album de paréisser en 2014, Pantais Clus, e lo single Indignats sortit l’11 de setembre passat. Nos i ofrirà una mena d’hip-hop experimentau entre dubstep, trap e dub, ont convida un rapaire de Brooklyn, Citizen Chance. Nos prepausa un tèxte, escrich a doas mans, una occitana e l’autra americana, un tèxte fòrt, engatjat, indignat, un omenatge a las revòltas popularas que coneissèm dempuei decembre de 2010.
 
La vidèo de Piget nos convida a sègre l’errança vomitiva d’un trader dins las charrieras de Nuòva York, entrecopada d’imatges d’archius dau movement Occupy, daus Indignats e de las primas aràbias ont apercebèm la malaürosament famosa Blue Bra Girl egipciana.
 
Un single exaltant per tots los que se senton indignats e que se ’chaba per un messatge de Thomas Sankara: “qu’es a queu prètz tanben que nos bastissèm, podèm pas esperar de l’ajuda d’un biais incondicionau”.
 
De descharjar a gratis sus lo sit de Pantais Recòrds emb un remix, mai que mai elèctro, dau grop MC2.
 
 
 
 
Maime Caillon

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Laurenç Gavotina
1.

Me platz.
De música ardiament modèrna, brau. E lèu lèu la seguiá !

  • 5
  • 0

Escriu un comentari sus aqueste article