Bandièra01 1180x150: Comuna de Tolosa

Actualitats

PoliticaInternacional

ETA nomena una delegacion per dialogar amb los govèrns espanhòl e francés

Lo ministre de l'Interior espanhòl a tornat dire que parlarà pas amb la banda

| Vilaweb




ETA a nomenat una delegacion per "un dialòg dirècte" amb los govèrns espanhòl e francés, segon d'informacions de France Press. L'organizacion a mandat un comunicat (pdf en francés, espanhòl, basc e anglés) qu'afirma que "La comunitat europèa e l'ensemble de las institucions europèas se tròban davant un enjòc que consistís a sosténer e promòure un procès dobèrt de cap a una solucion definitiva al conflicte que persistís al còr d'Euròpa".



Lo grop armat considèra que i a las condicions que cal per abordar la Declaracion d'Aiete, que demandava la fin definitiva d'ETA, lo dialòg amb Madrid e París e una solucion politica pels partits per arribar a la patz definitiva en Bascoat. Dins aquel sens, lo comunicat de la banda fa un apèl als govèrns espanhòl e francés al dialòg e avertís que "lo fach de rebutar la solucion beneficiarà pas a degun".
 
ETA parla tanplan del "besonh d'un dialòg entre los diferents actors en Bascoat per capitar d'acòrdis que contribusiràn a una patz durabla". Demest las questions que tant ETA coma las organizacions politicas e sindicalas considèran basicas, i a lo regropament dels presonièrs, la reconeissença e la compensacion a totas las victimas del conflicte e la territorialitat del Bascoat.

En responsa al comunicat, lo ministre d'Interior espanhòl, Jorge Fernández Díaz, a repetit que l'executiu espanhòl parlarà pas amb ETA, e que contunha d'esperar la dissolucion de la banda e lo liurament de las armas. "Lo govèrn [espanhòl] negòcia pas, ni a negociat, ni negociarà pas jamai amb cap de banda terrorista", çò remarquèt. 

 

Lo comunicat arriba l'endeman de l'investidura de François Hollande coma president de la Republica francesa. Al delà, fa mens de doas setmanas que la Comission Internacionala de Verificacion (CIV) del cessament del fuòc anonciava qu'aviá constatat qu'ETA èra "prèsta a dialogar sus de questions practicas per consolidar lo procèssus" de patz. Lo 20 d'octòbre de 2011, la banda anoncièt lo cessament definitiu de l'activitat armada.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alícia Montpelhièr
1.

ETA es un movement que foguèt armat. Doncas, lo ministèri castilhan refusa de discutir amb eles… "Lo govèrn [espanhòl] negòcia pas, ni a negociat, ni negociarà pas jamai amb cap de banda terrorista". Una banda de terrroristas es un grop armat que semena terror. Tre que i a fòrça ont que siá, l'òrdre deis unes es la terror deis autres. Qué foguèt l'armada franquista se que non "una banda de terroristas" ? Qué foguèt l'armada de quin país qué siá dins un autre país que lo sieu, tre que faguèt tombar sa primièra victima ? Qué foguèt l'OTAN en Irak o en Afganistan ? Una banda de terroristas ! Qué pòt ben èsser l'armada d'occupacion de Palestina actualament, se que non una "banda de terroristas" ? Tot còs constituït de gents armadas es potencialament una "banda de terroristas". La condescendéncia castelhana aquí, encara un còp, ajuda pas a res, e parla ren que de mesprés… Mon papet, que resistiguèt a l'ocupacion nacionau-socialista d'Occitania e de França foguèt dit "terrorista" abans d'èsser medalhat per fach de Resisténcia. Autau ne serà tanben per aqueleis resistents de la causa basca, per ara empreisontats dins leis gàbias espanholistas, lo jorn qu'auràn obtenguda l'Independénica de son país.

  • 4
  • 0

Escriu un comentari sus aqueste article