Actualitats
Aran vòl enebir la culhida de camparòls als vesitaires que se lòtgen pas al país
Lo govèrn aranés vòl enebir la culhida de camparòls en Aran als vesitaires que se lòtgen pas al país. O permetrà solament als residents, als que i ajan una segonda residéncia o als toristas que sián lotjats dins un establiment reglat.
La nòrma se poiriá aplicar l’an que ven. “S’agís d’ua mesura de regulacion entà evitar era espoliacion des misharnons enes bòsqui dera Val d’Aran”, çò diguèt als mèdias lo sindic d’Aran, Carlos Barrera.
Segon lo sindic, aquela mesura “non a cap de prètzhèt de recrubament pr’amor qu’ei ua regulacion. Non s’aplicarà cap de taxa as residents, as proprietaris d’ua dusau residéncia, e tota persona que se lòtge ena Val d’Aran aurà eth dret gratuit d’accedir as bòsqui e reculhir es misharnons, sens limitacion de pes.”
De son costat, los del sector toristic planhon d’aver pauca informacion sus la nòrma e sus las possiblas sancions als toristas que se lòtgen pas en Aran.
Segon la Generalitat de Catalonha, Aran a la competéncia plena per decidir cossí regular l’accès als sieus bòsques.
Aquela decision arriba en seguida de las 7s Jornadas Micologicas, lo congrès de la Societat Catalana de Micologia, que se debanèt a Vielha del 12 al 15 de setembre.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#4 Òc, e la familhòta que se ven passejar pels bòsques se retròba ambe los pneus crebats. Son de practicas illegalas.
Es pas la culhida que ne cal interdire, mas la véndia… Las culhidas salvatjas s'arrestarián de tira. Per las limitar, en Savartés e Coseran, crebam los pneumatics de las àutos forastièras…
adixatz,jo que pensi qu'ei normau arreglamentar era cuelhuda deths camparòus pormor que n'em pas contents de veger monde de per tot de qui non son pas de nosta vier en eths nostes bòscs amassar tot e entath monde de nosta non sobrar pas un camparòu .
Aicí un ligam per la comuna de Josceirac :
http://archives-lepost.huffingtonpost.fr/article/2010/10/05/2251644_guerre-declaree-a-sousceyrac-autour-de-la-cueillette-des-champignons.html
Es malurosament une practica de privatizacion dels camparòls que se generaliza. Dins Òlt per exemple de comunas prenon d'arestats municipals per interdire als forastièrs la culhida de camparòls sus son territòri.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari