Bandièra01 1180x150: Comuna de Tolosa

Actualitats

Dos soldats franceses assassinats a Montalban

Tres jorns abans un autre militar foguèt tanben tuat a Tolosa.

Dijòus a l'entorn de 15 oras, a Montalban, policièrs e expèrts de l'Identitat judiciala sus la scèna de crim
Dijòus a l'entorn de 15 oras, a Montalban, policièrs e expèrts de l'Identitat judiciala sus la scèna de crim | DDM, Chantal Longo

Lo soldat mòrt a Tolosa, l'11 de març, foguèt assassinat amb una arma del meteis calibre. La polícia cèrca de testimònis. Se sap pas encara qui es lo tuaire mas, segon qualques fonts d'informacion, seriá un motociclista que seguissiá los militars.




Dos soldats franceses del 17n RGP (regiment paracasudista) son estats tuats, lo 14 de març al ser, en una fusilhada e un autre es estat ferit a Montalban (Bas Carcin) davant la lor casèrna. Segon TF1, los tres militars anavan tirar de sòus d'un distributor automatic al moment de l'atac, presumidament comés per un motociclista que los auriá seguits. La Dépêche a trobat de testimònis de l'atac.
 

Qualques jorns abans, l'11 de març, un autre militar foguèt tanben assassinat a tirs per un motociclista a Tolosa.
 

Los investigators escartan pas cap d'ipotèsi, malgrat qu'un pagament dels comptes ligat a una question d'estupefasents sembla pauc probabla. La pista d'un tuaire unic e isolat sorgís. "I a de semblanças inquietantas entre los dos afars", a dich Michel Valet, procuraire de Tolosa. Lo ministre de l'interior, Claude Guéant, a indicat que los pistolets utilizats a Tolosa e a Montalban son "del meteis calibre" mas "pas obligatòriament la meteissa arma".

Lo 17n RGP es estat desplegat recentament en Afganistan, çò que causa una autra ipotèsi. S'escarta pas tanpauc que los crimes ajan una connotacion racista: las tres victimas son d'origina maugrabina, la quatrena antilhesa. "Cresi pas a las coïncidéncias", çò ditz un naut responsable de la polícia, qu'a paur "qu'aquel tipe siá un fòl o un terrorista".

Lo ministre dels afars estrangièrs, Alan Jupèr, a condemnat los assassinats e a refusat d'establir un ligam amb la preséncia de soldats franceses en Afganistan. 

Occitània compta de nombroses regiments paracasudistas franceses.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article