Bandièra01 capçalera  1180x150: Novestivada

Actualitats

L’independentisme escocés pren fòrça

Vint mila manifestants, lo doble de l’an passat, emplenan las carrièras d’Edimborg per l’independéncia

A un an de la convocacion del referendum subre l’independéncia d’Escòcia, Edimborg visquèt dissabte 21 de setembre una granda manifestacion independentista amb mai de vint mila participants, segon los organizaires; es lo doble de la marcha que se faguèt l’an passat. Per fòrça mond, aquela marcha foguèt l’illustracion dels darrièrs sondatges, que reflectisson una creissença de l’independentisme, e mai se lo “non” contunha de se plaçar sensiblament davant lo “òc”. Lo primièr ministre escocés, Alex Salmond, dins un dels discorses que se faguèron a la fin, assegurèt que lo referendum èra una “oportunitat unica” per aconseguir çò que cap de generacion prèvia d’escoceses aviá pas pogut far “e que pauc de païses faràn pas jamai”. 

Per Salmond, la consulta permetrà de decidir subre “un futur nòu de prosperitat e egalitat d’una manièra totalament pacifica, civica e democratica”. Tanben diguèt que la campanha per lo “òc” se basava sus d’arguments solids e que la majoritat de la populacion escocesa voliá contrarotlar los poders essencials per decidir subre “las ressorsas naturalas, l’estat del benèsser o las retiradas”. “E aqueles poders, los poders de las gents, nonmàs se pòdon aténher en votant de òc”, çò defendèt. 

Segon lo primièr ministre escocés, la campanha per lo “non”, per contra, se basa sus lo sistèma del Parlament britanic de Westminster, que “representa pas l’opinion escocesa ni las aspiracions d’Escòcia”. Per Salmond, i a “una majoritat naturala” per lo “òc” perque la majoritat del pòble es d’acòrdi que “las decisions d’Escòcia se prenon melhor en Escòcia que non pas a Westminster”.
 
En de declaracions a TV3 après la manifestacion, Salmond diguèt qu’a Escòcia li aviá costat plan d’esfòrces e de negociacions per obténer que lo Reialme Unit daissèsse far legalament lo referendum, e encoratgèt Catalonha “a contunhar son camin”.
Tanben assistiguèron a la marcha la viceprimièra ministra Nicola Sturgeon, lo cap de la campanha Yes Scotland, Blair Jenkins, la deputada independenta Margo MacDonald, lo deputat dels Verds Patrick Harvie, e Colin Fox del Partit Socialista Escocés, e mai Carolyn Leckie de Femnas per l’Independéncia, entre d’autres.
Jenkins assegurèt que quand los ciutadans s’arrestèsson d’examinar los faches decidirián de votar en favor de l’independéncia. “Retirats, parents, estudiants, òmes d’afaires, femnas, gents de tota la societat s’avisaràn qu’un vòte per lo «òc» a de sens per nosautres coma nacion e coma individús”, çò diguèt.

La manifestacion se debanèt dins un ambient festiu en començant a High Street e en s’acabant a Calton Hill, un puèg de la capitala escocesa considerat coma patrimòni de l’umanitat per l’UNÈSCO. Ailà, los participants arborèron de bandièras blavas e blancas escocesas, conegudas coma saltires, e tanben s’i vegèt fòrça bandières d’autras nacions sens estat. A Calton Hill faguèron las dichas e los concèrts. 

 


_____
Notícia reliada:

     - BBC: Supporters march for independence
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

William Walace
2.

#1 Tot lo clan Mac Esaquò i èra per desliurar Escòssia !

  • 1
  • 0
Pirolet
1.

Vèsi Mac Donald mas vèsi pas Mac Arèl dins la marcha. Bastarà per apiéjar l'independéncia d'Escòcia?

  • 3
  • 0

Escriu un comentari sus aqueste article