Bandièra01 1180x150: Comuna de Tolosa

Actualitats

Estat espanhòl: lo Partit Popular impausa una lei de l’educacion contra los dreches lingüistics

Totes los partits, levat lo PP, an refusat aquela lei qu’an qualificada de “franquista”, mas lo PP a fach valer sa majoritat absoluda

José Ignacio Wert
José Ignacio Wert
Totes los partits politics del Congrès dels deputats espanhòl, levat lo Partit Popular (PP), refusèron ièr la lei de reforma educativa de l’estat espanhòl (LOMCE segon sa sigla en castelhan). La lei prepausada pel ministre José Ignacio Wert es la setena dempuèi la dictatura e s’impausarà dins las escòlas per la majoritat absoluda del PP. De son costat, Wert diguèt que li auriá agradat d’aver mai de sostens a sa lei educativa, mas “es pas estat possible per la manca de volontat e de dialòg que s’es demostrada”.
 
Totes los partits, levat lo PP e UPYD, an remarcat que s’agís d’un retorn a la politica educativa de la dictatura de Franco. De fach, en julhet passat signèron ja un acòrdi d’engatjament per abolir aquela la LOMCE quora aurián la capacitat parlamentària d’o far. De son costat, lo govèrn de Catalonha va contestar aquela lei al Tribunal Constitucional.
 
La lei, qu’ara deu passar lo vòte del Senat, establís que l’espanhòl es la sola lenga veïculara dins tot l’estat, crèa d’examens d’avaloracion centralizats a Madrid en fin de primària e segondària e redusís lo poder de las associacions de parents d’escolans.
 
Las matèrias restacadas a las lengas dichas cooficialas (occitan, catalan, galèc e basco) se considèran de matèrias d’especializacion opcionalas. Lo PP argumenta que sa lei vòl “esclarzir que lo castelhan pòt pas èsser expulsat ni mesestimat dins lo sistèma educatiu”. Mas se s’aplica aquela lei, perdrem l’immersion en aranés dins las escòlas d’Aran.
 
Mai d’un collectiu de professors an manifestat qu’obesiràn pas a aquela lei. Pasmens la Generalitat de Catalonha n’assumirà la desobesissença per evitar d’insomissions d’ensenhaires e per portar pas la tension dins las escòlas. Ça que la, aquela lei s’aplicarà en setembre de 2014, e “fins en setembre se pòdon passar fòrça causas”, çò diguèt la conselhièra de l’ensenhament de Catalonha, Irene Rigau.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jòrdi St Andrieu de Rèocalonga ( Occitània)
4.

Vergonha!

  • 4
  • 0
Chatbèrt de Bareiran Castèl de Queribus
3.

Un estat catalan independent, lèu, lèu !

  • 13
  • 1
Felip Martèl Montpelhier
2.

En parlant d'aquò, ont ne son las enquestas suu finançament mai o mens occult dau PP en generau, e d'unes de sos dirigents en particulier ?

  • 14
  • 0
Ernèst Guevara Jr. L'Avana
1.

Wert diguèt : “es pas estat possible per la manca de volontat e de dialòg que s’es demostrada”. Definicion fascista del "dialòg" : te disi çò que deves pensar, e tu, te calas…

  • 14
  • 0

Escriu un comentari sus aqueste article