Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Un aranés enes Corts de Cadis de 1812


En 200 anniversari dera Constitucion espanhòla de 1812, er Archiu Generau d'Aran que prepause de conéisher a un aranés que i participèc

Era promulgacion dera Constitucion de 1812, òbra de Salvador Viniegra (Museo de las Cortes de Cádiz)
Era promulgacion dera Constitucion de 1812, òbra de Salvador Viniegra (Museo de las Cortes de Cádiz)

Eth 19 de març se complissen 200 ans dera promulgacion dera Constitucion espanhòla de 1812 o Constitucion de Cadis. Aguesta nòrma fonamentau siguec redigida pes Corts espanhòles, amassades en Cadis (Andalosia), jos eth sètge dera armada de Napoleon. De caractèr liberau, qu'ei aperada "Pepa”, peth hèt d’èster aprovada eth dia de Sant Josep.
 
Un aranés, Felip Aner Benosa des d’Esteue d'Aubèrt, que viuec aguesti eveniments e que n'i participèc.


Aner que siguec membre deth conselh de govèrn dera Val d’Aran en 1808 e membre deth Conselh Superior de Catalonha, en representacion d'Aran a comptar de 1809. Siguec comissionat dera autoritat militara en Vic, Valéncia, Conca de Tremp e Val d’Aran e nomentat redactor des instruccions deth Conselh Superior de Catalonha enviades as deputats presents enes Corts de Cadis de 1810. En aguest tèxte se manaue as deputats que demanèssen era restitucion des institucions existentes en Catalonha enquia 1714, eth pagament pera luta des catalans contra es tropes napoleoniques e era creacion de conselhs regionaus connectadi damb es corts generaus. 

 

Que siguec deputat enes corts de Cadis en 1810, a on hec un totau de 261 intervencions. A nivèu ideologic que se mantenguec dobitatiu entre eth liberalisme e eth tradicionalisme, mès en tot cas que consideraue qu'era prioritat ère de guanhar era guèrra. Defenec tanben er usatge des còrsi franqui en lòc des militars professionaus. En junh de 1812 partic tà Portugal entà suenhar-se d'ua malautia dera que moririe en octobre deth madeish an. 

 

En Archiu Generau d’Aran se conserve un petit hons documentau sus aguest illustre aranés ena Colleccion Benet Galceran Ribó. S'agís de 8 documents des ans 1781 ath 1812. Un d’eri que rapòrte era concession dera Crotz de Sant Jòrdi a Felip Aner coma vocau deth Conselh Superior de Catalonha. Eth hons que se pòt consultar en linha.

Ferriòl Macip

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Testar test
1.

Notificacion‑per‑e‑mail‑se i a de novèls  comentaris

  • 0
  • 0

Escriu un comentari sus aqueste article