Bandièra01 1180x150: Comuna de Tolosa

Actualitats

La “pura foliá” de protegir las lengas minorizadas de França, segon un Front Nacional en ascension

| Blandine LC

La formacion de Marine Le Pen, que domina las intencions de vòte en França per las eleccions europèas, remarca l’importància de sosténer una identitat nacionala amb la lenga francesa coma un dels sieus pilars. Lo partit antiimmigracion votèt fa un mes al Parlament Europèu contra la proteccion de las lengas menaçadas.


Lo succès qu’aguèt, fa un mes, l’eurodeputat còrs François Alfonsi, en recebre lo sosten de la majoritat dels autres eurodeputats a sa proposicion de s’engatjar mai en la defensa de las lengas minorizadas d’Euròpa, aguèt d’ombras: 50% dels 26 vòtes desfavorables venián dels eurodeputats franceses (que representan 10% del Parlament Europèu). Los tres eurodeputats del Front Nacional (FN) francés —dont Jean-Marie Le Pen e sa filha Marine— se distinguiguèron per lor vòte contrari.
 
Aquela posicion de l’FN es tornada a l’òrdre del jorn, mas ara amb un autre accent: los sondatges mai recents indican que lo partit antiimmigracion poiriá aténher la majoritat dels eurodeputats franceses dins lo Parlament Europèu a las eleccions de mai de 2014. La pojada espectaclosa del Front Nacional s’acompanhariá d’una ascension tanben previsibla del vòte per de partits similars dins d’autres estats membres de l’Union Europèa.
 
L’animositat de l’FN —coma tanben dels sieus collègas europèus— envèrs las lengas minorizadas es pro coneguda dempuèi l’epòca que Jean-Marie Le Pen (a prepaus, un nom d’ostal d’origina bretona, que vòl dire “cap”) fondèt e dirigiguèt aquel partit, qu’a l’ora d’ara es en mans de sa filha Marine. Un dels darrièrs posicionaments, dins aquel sens, proven del sieu vicepresident, Florian Philippot: “Après que la ministra [Geneviève] Fioraso vòl impausar l’angloamerican a l’universitat francesa, ara lo ministre de l’Educacion Nacionala Vincent Peillon se declara favorable a «un refortiment de l’ensenhament de las lengas regionalas» dins l’escòla. Seriá estat preferible que lo ministre aguèsse anonciat un «refortiment de l’ensenhament de la lenga francesa» dins l’escòla, se nos avisam que 20% del jovent arriba al collègi sens dominar corrèctament la nòstra lenga”. Las disposicions ministerialas, çò ditz Philippot, “son una una pura foliá, quand lo francés se tròba en grand perilh”. “Perqué aquela obsession contra la lenga francesa de la part de ministres qu’òm crei que la lor caldriá defendre?”, se demanda lo politician de l’FN, que conclutz: “Demandam lo respècte de l’article 2 de la nòstra constitucion: «La lenga francesa es la lenga de la Republica»”.
 
Ara la propaganda fàcia a las eleccions europèas que venon, en mai d’atacar la ratificacion, promesa per lo govèrn actual francés, de la Carta Europèa de las Lengas Regionalas o Minoritàrias, se centra en afirmar qu’o cal far tot per que França demòre pas diluida dins l’amalgama de lengas qu’es l’Union Europèa. O cal far tot, çò ditz lo partit de Le Pen, per sosténer l’identitat francesa e per empedir que res la minimize. Segon l’FN, èsser permissius tocant las lengas dichas regionalas menariá a dobrir la pòrta a la reconeissença de las lengas dels immigrants. Seriá, coma disiá arunan lo pòrtavotz de Marine Le Pen, Bertrand Dutheil, tombar dins una trapèla qu’es “lo projècte reaccionari de transformar las societats en un mosaïc”.
 
Aquelas opinions sus çò que significa la diversitat son mai que mai sostengudas pels partisans de las opcions nacionalistas francesas qu’an quitament una expression institucionala, coma es lo cas en Occitània, Corsega e Bretanha e ont, paradoxalament, lo Front Nacional avança. E la prevision es qu’avance encara mai dins los rendètz-vos electorals avenidors, en comptant amb l’adesion de gents que son d’origina immigrants.
 
A l’ora d’ara, la propaganda de Marine Le Pen ensaja de demostrar que l’opcion que dirigís es pas reaccionària. L’FN plaideja per que lo nacionalisme francés siá uèi lo produch de la modernitat politica e, singularament, de la Revolucion Francesa. En consequéncia, segon ela, cal arrancar los individús de lors comunautats d’origina per los fondre dins un ensems representat per un Estat francés de totes. Consenta amb la vision de l’FN, França poirà èsser, aital, plan sola, sobeiranament, e plan fòrta, al nivèl dels partits, davant d’autres estats europèus Defendon que lo ròtle de la lenga unica dins l’Estat francés se pòt pas rebaissar jos cap de concèpte.
 
 
 
 
 
 
 
Aqueste article es adaptat de Nationalia, amb qui Jornalet a un acòrdi de collaboracion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

belcour fijac
15.

Paure Melenchon...e la CNT Tolosa tamben...mas i a pas pus cap de miras (?)
Mas i auriá de cons dusqu'al improbable?

  • 0
  • 0
Ernèst Guevara Jr. L'Avana
14.

Es pura folia de sosténer lo Front nacional Faicista Francés… e pr'aquò, entre 1939 e 1944, quantes 95% de la populacion sosteniá lo govèrn faiscista de Veichei ? E quantas resistents, nas e nas amb eles ? Òr, sètz pas sens saber qu'occitan es una lenga de resisténcia ?…

  • 5
  • 0
JIG
13.

Vienossin au poder que poish perfèitament esmaginà'us a espionar los qui parlan breton, basco o occitan, sus la tela, a casa, pertot ! entà'us secutar e har carar.
E cau pas esperar qu'Euròpa nos protegiré.

  • 2
  • 0
garric
12.

#11 Al mens poiràn pas barrar lo Jornalet, qu'es en Aran. Serà totjorn aquò de salvat.

  • 9
  • 0
lo passejaire Tolosa
11.

#7 Per contra se venguèsson al poder...... I vòli pas pensar...

ièu tanpauc ! e sèm pas solet. Se prenon un jorn lo poder seriá la fin de l'occitan e de mai d'autras causas. Cal se mesfisar aprèp sera tròp tard

  • 5
  • 0

Escriu un comentari sus aqueste article