Bandièra01 1180x150: País Invisible

Actualitats

Cinc mòrts per un tèrratrem de 5,9 gras al nòrd d'Itàlia



A gigotat la region d'Emília-Romanha a l'entorn de quatre oras del matin




| Vilaweb


Un fòrt tèrratrem a gigotat de matin lo nòrd d'Itàlia. Lo sisme a causat almens cinc mòrts e de desenats de ferits en tot provocar de grèus damatges, segon l'agéncia Reuters. Lo tèrratrem, de 5,9 gras, s'es debanat a l'entorn de quatre oras a la region d'Emília-Romanha. L'epicentre es plaçat a 35 quilomètres al nòrd-oèst de Bolonha e 10 quilomètres de prigondor. Los movements se son tanben sentits dins las regions vesinas. S'agís del sisme mai potent qu'a tustat a Itàlia après lo tèrratrem de L'Aquila fa tres ans.




Los mòrts son dos obrièrs e una femna de mai de 100 ans en s'estartalhar lo tet d'una fabrica de ceramica de Sant Agustin, a Ferrara. Un tresen trabalhador industrial es mòrt en l'escrancament de la fabrica que trabalhava a Bondeno. La cinquena victima, segon lo jornal "Il Messegero" es una femna de nacionalitat alemanda, mòrta a San Pietro in Casale (Bolonha). Ça que la, lo ministèri italian d'Interior a pas confirmat aquelas chifras.

 


Doas tors se son tombadas a las vilas de San Felice sul Panaro, a l'entorn de Modena, e de Finale Emilia, ont s'es evacuada una residéncia geriatrica davant lo perilh d'esbaussament. 

 

Las scènas de panic se son repetidas dins qualques vilas del nòrd d'Itàlia, mai que mai amb lo segond dels tèrratrems, lo de mai intensitat, a tres oras, que foguèt precedit per un de magnitud 4,1 segon l'escala de Richter, a doas oras. Las províncias de Venèt, Toscana, Lombardia, Trentin Aut Adige e Friol-Venècia Júlia an sentit los tremoladises dels dos sismes. 

 
Segon a informat lo Servici Geologic dels Estats Units (USGS), lo darrièr sisme, lo mai intens, aviá una magnitud iniciala de 6,3 segon l'escala de Richter, l'epicentre del sisme s'es plaçat a 35 quilomètres al nòrd-nòrd-oèst de Bolonha e a 70 quilomètres a l'èst de Parma, e a 10 quilomètres de prigondor. 

 

Lo tèrratrem mai intens qu'a patit Itàlia foguèt en 2009 e la siá magnitud foguèt tanben de 6,3 segon l'escala de Richter. La vila de L'Aquila demorèt devastada e moriguèron a l'entorn de 300 personas. 

 

Lo darrièr sisme s'enregistrèt al mes de genièr passat, la magnitud arribèt als 5,3 gras, e se sentiguèt dins las vilas de Gènoa, Bolonha, Turin e Milan. I aguèt pas de victimas mortalas e tanpauc de damatges.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

occitalia
1.

Per ara los mòrts son arribats a 7.

  • 0
  • 0

Escriu un comentari sus aqueste article