L’analisi d’un cran de fa 1,8 milion d’ans, trobat a Dmanisi (Georgia), indica que los primièrs membres del genre homo, classificats coma homo habilis, homo rudolfensis o homo erectus entre d’autres, en realitat fasián partida de la meteissa espècia.
 
La revista Science, que ne publicava un article lo 18 d’octòbre passat, explica que, a la diferéncia d’autres fossils d’homo, aquel cran, conegut coma cran 5, combina una pichona boita craniana amb una cara longa e de dents grandas. Foguèt descobèrt al bòrd de las rèstas de quatre autres ancessors umans, de fossils animals e qualques instruments de pèira, totes associats a la meteissa localizacion e periòde de temps.
 
A l’estudi an participat d’expèrts de Soïssa, Israèl, los Estats Units e Georgia. David Lordkipanidze, del Musèu Nacional de Georgia, expliquèt que las diferéncias entre los fossils de Dmanisi son pas pus grandas que las qu’existisson entre cinc umans modèrnes o cinc chimpanzés.
 
Tradicionalament, los cercaires an utilizat las variacions entre los fossils d’homo per definir las diferentas espècias. A comptar d’aquela trobalha, los autors de l’estudi suggerisson que los primièrs fossils d’homo que presentavan de diferéncias e que se trobèron en Africa, en realitat, representan de variacions entre los membres d’una sola espècia.
 
“La boita craniana e la cara del cran 5 se trobèron coma fossils separats en diferents luòcs d’Africa e se los poiriá aver atribuit a diferentas espècias”, çò afirmèt Christoph Zollikofer, de l’Institut d’Antropologia e del Musèu de Zuric, en Soïssa. Aquò es perque lo cran 5 amassa qualques unas de las caracteristicas clau que s’èran pas observadas ensems fins ara dins un fossil d’homo.
 
Los fossils trobats a Dmanisi “se veson fòrça desparièrs entre eles, e serián de bon identificar coma los d’espècias desparièras”, çò diguèt Zollikofer. “Ça que la, sabèm qu’aquelas personas venguèron del meteis endrech e dins lo meteis temps geologic e, en principi, representan una populacion d’una sola espècia”.