Bandièra01 1180x150: Comuna de Tolosa

Actualitats

A Hòs son malcontents de l’estat francés per sa gestion après los aigats

Lo giratòri nòrd-oèst de Hòs
Lo giratòri nòrd-oèst de Hòs | Google Maps
Malcontentament a Hòs (Comenge) per la gestion dels damatges de las inondacions de julhet passat. “Que sabèm ara que la reconstruccion deu Pont Vielh non serà cap presa en compte en la primèra fasa deu programa deus trabalhs indemnizats per l’estat tocant las catastròfas naturalas e los bens non assegurables”, çò planguèt a La Dépêche lo cònsol de la vila, Jean Lafont.
 
“Qu’èm decebuts”, çò apondèt, en tot precisar qu’aquel pont de betum èra una palanca fins en 1958, que connectava la vila amb los quartièrs de Guiaina e d’Eth Gravièr, sit inscrich al patrimòni.
 
De fach la decepcion comencèt ja amb lo giratòri al nòrd-oèst de la vila, qu’es un obstacle a l’escolament de Garona a la sortida de Hòs. “Nos trapam a l’entorn de la petita capèla dab a l’entorn d’1,20 mètre de sediments sus 1 ectar. Aquò que representa 9000 tonas de hanga. Qu’auriam desirat que la DIR Sud-Oèst e reconeguèsse la marrida causida d’implantacion d’aqueth giratòri”.
 
Abans de construire aquel giratòri, la municipalitat aviá ja avertit dels risques dins qualques documents e mai que mai dins una deliberacion en novembre de 2002, que precisava que “l’implantacion d’aqueth giratòri 150 mètres capvath evitariá las nosenças sonòras au quartièr de Guiaina e facilitariá l’escolament de las aigas en cas de crescuda importanta…” Es pr’amor d’aquò que Lafont esperava un engatjament possible entre los servicis de l’Estat e la comuna.
 
Per ara, lo conselh municipal de Hòs contunharàn de “se bàter tots los dias”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ròdrigò bigòrra
2.

N'ei pas era fauta der' estat Francès ,mès era det conselh generau dera Hauta Garona ,en aqueth departament sonque Tolosa conda çò d'autes que s'en foten .Per contra a nosta en Bigòrra o enas Hautas Pyreneas tots eths domaus provocats peths aigats deth mes de junh que son casi tots adobats o arreparats,plan segur eth conselh generau qu'i a hicat eths mejans ,qu'a pagat per avança eths tribalhs ,a Baretja,Luz sent Sauvaire,Cauteretz,e'ra Vath d'Aura tot en estat de fonccionar pera sason d'esquis qui arriba.

  • 0
  • 1
Terric Lausa Quilhan
1.

L'estat francés que servís a pas res en Occitània? Aquò's nòu !

  • 5
  • 0

Escriu un comentari sus aqueste article