Bandièra01 1180x150: Comuna de Tolosa

Actualitats

Lo bonet roge es vengut tornarmai lo simbòl de la revòlta dels bretons

| 7Seizh
La revòlta que comencèt en Bretanha contra l’ecotaxa a trobat un simbòl que l’identifica: lo bonet roge tradicional dels bretons. Aquel bonet emplegat pendent de sègles, qu’a passat temps lo portavan los païsans, es vengut un simbòl d’identificacion bretona, de còps un simbòl nacionalista, utilizat per de milièrs de personas per exprimir lor malcontentament envèrs París e sas mesuras fiscalas.
 
Se debanèt dissabte a Kemper una novèla manifestacion amb la preséncia de milièrs de bonets roges. Las revòltas se debanan pertot, d’un biais bretonista.
 
La manifestacion de Kemper acampèt entre 15 000 e 30 000 manifestants, entre los quals i aviá los movements politics bretonistas (Breizhistance, UDB, Partit Breton, MBP), lo sindicat FO, de païsans, de transportaires, de patrons, d’artisans, de comerçants, d’obrièrs e d’elegits de tota Bretanha. Los organizaires avián cridat a una manifestacion pacifica. Totun fòrça manifestants lancèron de projectils contra las fòrças de l’òrdre, que repliquèron amb de gas lacrimogèn e de canons d’aiga. Aquelas tensions contunhèron pendent una partida de la nuèch.


Lo meteis dissabte, una manifestacion concurrenta se debanèt a Karaez, convocada per d’organizacions parisencas d’esquèrra, tan sindicalas (CGT, Solidaris, FSU) coma politicas (Front d’Esquèrra, NPA, EELV). Se volián pas mesclar amb los patrons e d’unes, probable, volián evitar una dimension nacionalista bretona. Lo lidèr del Front d’Esquèrra, lo centralista Jean-Luc Mélenchon, aviá fustigat durament los manifestants de Kemper. En tot cas la contramanifestacion de Karaez aguèt pauc de succès, que se limitèt a qualques centenats de personas.
 
La rason de las protèstas en Bretanha es lo refús d’una nòva taxa que lo govèrn impausa als grands camions circulant pel país. Segon los productors bretons, es una taxa que penaliza las economias agricòlas coma la bretona, en favor de la granda indústria agricòla de las multinacionalas.
 
Lo bonet roge foguèt, de fach, emplegat coma instrument de protèsta en 1675. Aquel an, los païsans bretons se revoltèron contra lo rei Loís XIV qu’aviá creat de nòvas taxas per finançar la guèrra contra los Païses Basses. En solidaritat amb los païsans, las cronicas explican que fòrça ciutadans e nòbles bretons se capelèron amb lo bonet roge pendent totes los meses que durèt aquela crisi.
 
A l’ora d’ara lo bonet a portat la polemica perque l’ultradrecha del Front Nacional a ensajat de s’apropriar aquel simbòl. Après aver vist la reüssida del movement social breton, Marine Le Pen cambièt la fòto de son perfil de Twitter en vestissent un bonet roge e cridèt sos militants a seguir las manifestacions, çò que provoquèt las protèstas d’un fum de bretons.
 
La majoritat dels bonets roges son a l’ora d’ara fabricats per una sola entrepresa, Armor Lux, que n’a ofèrts qualques milièrs a divèrses grops de manifestants.
 
Trobaretz mai d’informacions sus la revòlta dels bonets roges sus 7Seizh.info.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernèst Guevara Jr. L'Avana
9.

De Bretons que manifèstan en francés…? Es pas la pena de sortir tantas bandièras celticas per contunhar de bramar dins la lenga de l'esclavatge.

  • 5
  • 1
Mathieu Castel Marselha
8.

#6#7 La denoncia (legitima) dau retorn dau fermatge (facha a posteriori, remarcarètz...) lèva pas lo reire gost pojadista iniciau d'aquela revendicacion, dins mon esperit...

  • 4
  • 0
Felip Martèl Montpelhier
7.

L'escandal vertadier de l'ecotaxa es efectivament aqueu : un consortium amb de filantrops coma SFR, Goldmann-Sachs o Thalès, amb l'SNCF, que s'engolisson 23% dau produch de la collecta, es polit ; nos ramenta lo temps dels fermiers generaus. E aquo relativiza las bramadissas patronalas. E, oc, seria temps que lo mond en Bretanha comprengan que los responsables vertadiers de la crisi son aquelos patrons que per corta vista an pas sabut investir quora e ont chalia. Quand un patrron fai una conaria, es sempre sos salariatrs que la pagan... E pas solament en Bretanha. E s'un poguesse evitar de parlar de "parisencs" per de sindicats o de partits que son pertot en França...

  • 6
  • 0
Gerard Joan Barceló Pèiralata
6.

#5 Cau espepissar lei detalhs de l'ecotaxa, que ven de denonciar Eva Joly: 20 % dei revenguts de l'ecotaxa van a una societat privada! (http://www.liberation.fr/societe/2013/11/04/eva-joly-souhaite-une-enquete-sur-l-ecotaxe_944389) Conven tanben de criticar la politica de l'SNCF, que fai tot per lo TGV e pas grand causa per lo desvolopament dau transpòrt dei mercandisas. Tot aquò s'amerita una analisi globala dei defauts dau centralisme francés.

  • 18
  • 0
Mathieu Castel Marselha
5.

#3 La preséncia de drapèus bretons e de la lenga bretona justificaria un sostenh a una causa ? A ieu aquesta ecotaxa me pareisse una bòna causa. Bretanha creba de son agricultura productivista. E ora de començar de comprene que podem pas contunhar d'abalir de pòrcs ailà, de lei mandar en Alemanha a l'adobador puei de lei tornar en Bretanha per lei vendre dins lei supermercats... Es normau que l'ague de contrapartidas financiàrias per aquelei qu'inondan lei rotas de sei camions de transpòrt.

  • 12
  • 0

Escriu un comentari sus aqueste article