Las cauçaduras e l’etica que son duas causas de mau apariar. La màger part de las cauçaduras venudas a noste que son fabricadas en China o dens país d’Asia on lo dret deu tribalh n’ei pas tostemps respectat. Au delà, entaus vegetarians, que vad un copacap vertadèr.
 
Cauçaduras shens briga de cuer, que n’i a despuish bèth temps dens la grana distribucion: basquets, màgerment, e tanben cauçaduras a hèra bon mercat fabricadas en Asia mes qui ne duran pas e qui puden hèra lèu per’mor los pès n’i respiran pas.
 
Que i a tanben las espartenhas e los esclòps, segur, mes peus esclòps que cau conéisher un bon esclopèr (mau talhats, que dòlen los pès) e dab las espartenhas, l’ivèrn qu’avem hred.
 
Que i avè donc un mercat per qui volè apitar un comèrci e ua industria.
 
L’un deus pionièrs de las cauçaduras shens cuer qu’estó l’anglés Robin Webb, creator de la marca Vegetarian Shoes. Un dia, ce conta suu son sit, qu’entenó qu’en cèrtas part d’Africa, lo monde recuperavan pneumatics vielhs entà har sòlas de cauçaduras. Qu’ac essagè, que li agradè e que comencè de har cauçaduras dab tot çò qui’u cadè devath la man, d’un biaish artisanau. Mes com èra vegetarian, ne voló pas emplegar cuer.
 
Apuish que descobrí un teishut microfibra utilizat en nautisme qui deishava passar l’aire mes pas l’aiga e qui’u permetó de har cauçaduras mei “ordinàrias” qui semblavan las de cuer e qui, com eras, deishavan los pès respirar. Que comencè a las fabricar e a las véner en 1990. Solet purmèr, e dab un solet modèl.
 
Au briu de las annadas, navèths modèls de cauçaduras e navèras personas qu’entrèn dens l’entrepresa.
 
Uei, las Vegetarian Shoes que son hèitas dens mantua usina en Euròpa, comprés dens ua usina cooperativa qui s’establí en 1881.
 
E aquesta marca n’ei pas la sola a s’adreçar aus vegetarians e aus autes dab cauçaduras shens cuer de qualitat: Novacas, Olanthe, Good Guys... Totas aqueras marcas (e mei d’autas) que revendican de véner cauçaduras shens cuer fabricadas en Euròpa dens condicions eticas entà las bèstias, entaus umans e entà l’environament.
 
Recentament, la marca Dr. Martens qu’a tanben lançat ua colleccion de cauçaduras “vegan”... mes fabricadas en China.
 
 
 
 
Pascau Sebat