Bandièra01 1180x150: Comuna de Tolosa

Actualitats

Almens setze mòrts a causa dels auratges en Sardenha

De pluèjas torrencialas an devastat lo nòrd-èst de l’illa. I a d’inondacions, de talhs d’electricitat e d’interrupcions dels transpòrts

Un vertadièr ciclòn devastèt lo nòrd-èst de l’illa de Sardenha la nuèch de diluns a dimars, en i provocant almens setze mòrts e fòrça infrastructuras damatjadas a causa del fòrt vent, de las inondacions e del desbordament de qualques rius. Las zònas d’Òlbia e Nùgoro son las mai afectadas. “Malastrosament, la situacion es dramatica e caotica”, segon lo president sarde, Ugo Cappellacci. “Òlbia es inondada e qualques ponts son destruches dins la província de Nùgoro, ont la situacion es grèva atanben”.
 
L’alèrta meteorologica pel passatge del ciclòn Cleopatra, qu’a causat tanben de talhs electrics e d’interrupcions del transpòrt, s’es estenduda per tota l’illa.
 
Lo quite president sarde prevei que i pòt aver mai de victimas demest lo desenat de personas que son pas encara localizadas. De milièrs de fogals son damatjats e las ostalariás de la zòna d’Òlbia son plenas de personas evacuadas. De nuèch, los pompièrs faguèron 600 intervencions, la majoritat en Gaddura e dins la província de Nùgoro.
 
Lo conselh dels ministres italians s’amassèt ièr de matin d’urgéncia per decretar l’estat d’emergéncia en Sardenha.
 
 
 
_____
– Agéncia de nòvas ANSA.
La Nuova Sardegna.
L’Unione Sarda.
Il Giornale



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article