Aqueste dissabte de vèspre, l’estadi de Wembley es prèst per la recepcion de las doas mièjas finalas d’aquesta edicion de 2013 de la Copa del Monde de XIII.
 
Un Wembley, dins sa version novèla (dobertura en 2007) qu’es un luòc cargat d’istòria en çò que concernís l’espòrt anglés e mondial mas tanben pel XIII.
 
L’estadi, dins sa primièra version, s’inaugurèt en 1923. S’i organizèt los Jòcs Olimpics de 1948 e la finala de la Copa del Monde de fotbòl de 1966 qu’Anglatèrra ganhèt.
 
L’estadi, bastit dins lo nòrd-oèst de la capitala anglesa per èsser provisòri, tenguèt lo còp mai d’80 ans. L’inauguracion demòra dins totas las memòrias. Èra una finala de la Copa d’Anglatèrra de fotbòl entre Bolton e West Ham. Se vendèt 126 047 bilhetas, mas se parla d’un public entre 150 000 e 200 000 personas! Tenguèron pas dins las tribunas, alara envasiguèron la pelena! La polícia a caval capitèt a desliurar la pelena. Lo policièr George Scorey faguèt un trabalh de primièra amb son caval blanc Billie: dempuèi se parla de la Finala del Caval Blanc. Mas una part del public demorèt al ras de las linhas e un espectator se faguèt assucar per un balon reçauput en plen morre!
 
La primièra finala de la Cup de XIII que se debanèt a Wembley foguèt la de 1929: victòria de Wigan fàcia Dewsbury, 13-2. Las esquipas d’Anglatèrra e de la Grand Bretanha an jogat fòrça partidas a Wembley que recebèt de finalas de la Copa del Monde en 1992 e 1995.
 
Dins l’estadi ancian, se vegèt de partidas de cricket, de fotbòl gaelic, de fotbòl american, d’hurling e quauquas partidas de XV. I aviá tanben una pista per las corsas de lebrièrs.
 
Fòrça artistas joguèron dins l’estadi coma The Rolling Stones, Madonna, U2, Pink Floyd, Genesis, AC/DC, Oasis, Tina Turner o Michael Jackson (per 16 concèrts en 1988). Òm se soven del Live Aid de 1985 o d’un concèrt en omenatge a Nelson Mandela en 1988.
 
Wembley lo Vièlh barrèt sas pòrtas en 2000 e foguèt desrocat en 2003. I agèt una discussion bèla per saupre se se gardariá las Torres Bessonas qu’èran un imatge simbolic de l’estadi: fin finala, foguèron pas servadas.
 
L’estadi novèl, proprietat de la Federacion Anglesa de Fotbòl, dobriguèt en 2007 amb 90 000 sètis, totes cobèrts. Sol lo Camp Nou de Barcelona es mai grand. En tresplomb de l’estadi, se bastiguèt una arca de 133 m de nautor. L’inauguracion oficiala se faguèt per la finala de la Cup de fotbòl entre Manchester et Chelsea lo 19 de mai (89 826 espectators). Al mes d’agost, los Dracs catalans i disputèron la finala de la Cup (perduda fàcia a St. Helens: 30-8) davant 84 241 espectators. Aquela chifra fa del club tretzista catalan la formacion francesa dels espòrts collectius qu’a jogat amb una mai granda assisténcia! Mas la chifra mai bèla per una finala de Cup aperten a l’estadi dins sa version anciana: 99 801 espectators per la finala de 1985 entre Wigan (encara!) e Hull.
 
Dins los recents concèrts, de notar aquel de Bruce Springsteen en junh passat. Aprèp fòrça discussions, la direccion de l’estadi a acceptat qu’unas partidas de la Copa del Monde de XV de 2015 se joguèssen a Wembley.
 
Mas, per l’ora, plaça al Big Hit/Grand Còp. Sul site de l’estadi, d’espectators pausan de questions angoissadas: “Serai obligat de me setar a costat d’un espectator d’una autra nacion?” (aquel deu pas èsser acostumat als estadis tretzistas) o “Quant còsta un esclopal de cervesa?”
 
S’avètz pas lo temps d’anar a Londres, las doas mièjas finalas se poiràn seguir en dirècte sus BeIn Sport. I deu plan aver un cafè pròche de l’ostal per se recampar entre tretzistas e esportius per seguir l’eveniment.
 
 
 
 
Alan Roch