Bandièra01 1180x150: Comuna de Tolosa

Actualitats

Los ciutadans de Soïssa vòtan uèi se cal limitar los salaris mai nauts

Lo referendum es impulsat per las Joventuts Socialistas, que creson que la diferéncia salariala entre obrièrs e dirigents es exorbitanta

Coma de pertot, en Soïssa la diferéncia entre los salaris mai nauts e los mai basses es sovent enòrma. Pr’amor d’aquò, las Joventuts Socialistas amassèron cent mila signaturas per convocar un referendum sus la dicha Iniciativa 1:12, que vòl que la constitucion diga que qualque salariat pòt recebre en un an mens que çò que recep en un mes lo dirigent de la meteissa entrepresa.
 
Lo vòte se debana uèi e sos promotors defendon que la constitucion soïssa reduga aquela diferéncia a una proporcion maximala d’1:12. La proposicion a lo sosten del Partit Socialista, dels Verds e dels sindicats. Lo govèrn conservator e las organizacions patronalas refusan la propòsta qu’agrada pas tanpauc a fòrça entrepreneires. Lo president de Nestlé, Peter Brabeck, a menaçat de cambiar la sedença de l’entrepresa, la mai granda del mond del sector alimentari, se l’iniciativa capita plan.
 
Los dirigents de las Joventuts Socialistas, Filippo Rivola e David Roth, son al cap d’aquela iniciativa, que cèrca de rebaissar una diferéncia salariala que comencèt d’aumentar exponencialament dels ans 1980 enlà. Per exemple, en 1984 la diferéncia salariala entre lo salari mejan e lo d’un naut executiu èra d’1 a 6 e en 1988 arribèt a 1 a 13. Dempuèi, la prevalença de la politica neoliberala a multiplicat astronomicament aquela relacion, segon Rivola e Roth, fins a 1:43 en 2011, e a 1:93 a l’ora d’ara.
 
 
Soïssa aprovèt ja en març de limitar los beneficis dels dirigents
 
Lo chepic dels entrepreneires tanben a a veire amb l’aprobacion, en març passat, d’una iniciativa semblabla. 67,9% dels ciutadans votèron en favor que los accionaris de las companhiás cotizantas poguèsson forçar un vòte e vedar las retribucions que s’assignèsson als dirigents de l’entrepresa.
 
La proposicion, qu’aurà la forma d’un emendament constitucional, foguèt aprovada après sèt ans de campanha dirigida per l’èx-entrepreneire e politician Thomas Minder, e mai se la nòrma finala, aprovada prèviament pel parlament, rebaissa la proposicion originala.
 
Los accionaris poiràn decidir las retribucions convencionalas, mas tanben las gratificacions de benvenguda e de fin de relacion que recebon abitualament los nauts dirigents. De mai, l’entrepresa restarà obligada de rendre compte als accionaris sus totes los crèdits que sián concedits als dirigents.
 
Se los dirigents de las entrepresas complisson pas los limits impausats pel conselh general dels accionaris de cada societat, pòdon èsser condemnats a un maxim de tres ans de preson. Lo govèrn soís e las organizacions patronalas s’opausavan atanben a l’iniciativa.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lutz
8.

Duas reflexions sus aquela prepausicion de votacion :
• auriá pas res cambiat als pichons salaris, l'argent dels grands patrons seriá estat amagat endacòm mai, es tot (e doncas pas d'impòst dessús, mai a i perdre qu'a i ganhar ?). Cal pas creire que seriá estat una larga augmentacion de tot lo monde.
• una prepausicion que s'ataca a las conséquéncias, pas a las causas : los sectors professionals ont los escarts de salaris son los mai nauts en Soïssa son la farmacia e la banca (mai de 1/100). Question : perqué ? Alavetz que la mai granda cadena de supermercats ailà es dins un rapòrt de 1/13. I auriá pas, per asard, de secrots mai «ajudats» per la confederacion, financiarament o legalament, que d'autres ?

Darrièra question : çò intolerable, es que i aja de rics, o que i aja de paures ?

  • 3
  • 0
pimflòid
7.

#2 65% contra!!!??? Ne compreni pas!
Quins argument podem emplegar per justificar qu'un patron se ganhe mei de 12 còps çò qui ganha un obrèr?

12 còps mei qu'ei dejà enòrme... çò de matematicament improbable, en tot cas, qu'ei que los 65% contra deus 53% qui an votat sian tots patrons qui "ganhan" mei de 12 còps çò qui pagan los lors obrèrs e qui vòlen continuar.

Donc que i a espleitats qui an votat peus lors espleitaires... Ne compreni pas quin se pòt. Que vau seguir lo ton ligam...

  • 3
  • 0
JIG
6.

#5 Completament d'acòrdi. La mesura de la riquessa es una question de proporcion. Per aver de mond obscenament rics, cal de pauretat obscèna.

  • 5
  • 0
Ernèst Guevara Jr. L'Avana
5.

« Lo referendum es impulsat per las Joventuts Socialistas, que creson que la diferéncia salariala entre obrièrs e dirigents es exorbitanta »… Rectificacion : o "creson" pas, o constatan. Cossí una persona que trabalha poiriá s'ameritar 1000, 2000, 10 000 còps mai qu'una autra ? Aquò as pas qu'un sol sens. Los que "ganhan" sòmas aital se considèra coma onticament superiors als autres, çò que fasián ja los esclavagistas de l'Antiquitat. Es objectivament impossible de "ganhar" sòmas pairèras ! De sòmas aital non se ganhan pas : se panan !

  • 6
  • 0
JIG
4.

#3 Tè, hdp ! que'm soi borrat d'article, pegalhòt… :D
Que vau anar hicar lo comentari on cau, préner la tisana, e au lheit !

  • 4
  • 0

Escriu un comentari sus aqueste article