Bandièra01 1180x150: Comuna de Tolosa

Actualitats

Un Monde XIII: los Kiwis a la còrna

Jòia dels Kiwis, total tristum pels angleses!
Jòia dels Kiwis, total tristum pels angleses!
Dins la cronica de dimenge, lo Joan-Francés Albèrt vos contèt la patetica darrièra minuta de la mièja finala qu’opausava angleses e neozelandeses aqueste dissabte a Wembley, en preséncia de 66 000 fisèls de la causa tretzista dins aquel temple de l’espòrt. Los angleses joguèron lor melhora partida de la competicion, mas aquò sufiguèt pas.
 
Ça que la, los Negres èran melhor dintrats dins la partida, sens poder concretizar: çò que capitava lo tresena linha O’Loughlin pels Blancs sus una liberacion de pauma de Sam Burgess (18ª). Sinfield transformava, abans d’ajustar una penalitat (24ª): 8-0. A la mièja ora de jòc, la pauma volava de man en man costat neozelandés e traversava dos còps la largor del terren; sus l’ala dreita, lo centre Whare evitava de pausar lo pè en tòca e, en extension, desliurava una chistèra extraplanetària per Tuivasa-Shek que depausava la pauma en tèrra promesa! Johnson transformava, abans d’egalizar en ensacant una penalitat.
 
Lo segond temps se dobrissá sus un novèl ensag de Tuivasa-Schek (44ª) e una novèla penalitat (51ª): 14-8. Los angleses èran prèstes al combat e tornavan a l’assalt: ensajavan de passar per las alas, mas es lo centre Watkins que puntava (58ª) e Sinfield que mancava la transformacion, abans de lançar Sam Burgess marcar l’ensag que permetiá als Blancs de tornar prene l’avantage, 18-14, mercé a la transformacion de Sinfield (66ª). Demorava un quart d’ora de jòc. Los Blancs tenián lo còp, Sam Burgess èra designat òme de la partida… Tot anava plan per la formacion europèa fins a la fatidica darrièra minuta. Lo public macat bramava la decepcion de sos espèrs envolats, mas Johnson tremolèt pas. Mandèt la pauma de la transformacion de son ensag entre los pals e, atal, los neozelandeses poiràn defendre lor ben dissabte que ven a Manchester contra los vesins australians.
 
Los angleses capitèron d’emmoralhar lo Sonny Bill Williams, mas aquò libèra d’espacis per sos collègas e foguèt la victima del placatge naut que determinèt la darrièra penalitat fatala! Decisiu, doncas, de tot biais… Al nivèl de l’animacion del jòc, coma a Avinhon, lo mesclanha Jonhson e lo talonaire Luke balhèron lo ton al jòc Kiwi.
 
Avèm pas dit un mot de l’arbitratge. E quand se ditz pas un mot de l’arbitratge, quò vòl dire qu’èra impecable: òsca per l’australian Ben Cummins!
 
 
Rebombs de pauma
 
- Ambient. Pas de pausa sus la pelena de Wembley amb las divèrsas animacions que precediguèron e entrecopèron las doas mièjas finalas: cants, danças, musica...
 
- Patriòtas. Un pauc tròp los angleses: fiulets suls còps de pè de l’adversari, messatge en boca dins l’estadi: “Make noise for England”, estadi abandonat lèu per bon nombre un còp la mièja finala “anglesa” acabada.
 
- Simpatic. Lo sosten a l’esquipa de Fiji!
 
- Bramaire. Lo charraire de Wembley seriá estat un enquantaire de primièra!
 
- Occitans e catalans. Un bon nombre d’occitans e de catalans avián fait lo desplaçament a Londres per seguir aqueste eveniment bèl.
 
- Cervesa. A se demandar qual pòt èsser lo benefici del vendeire de cervesa a Wembley? Lo punt negatiu es lo nombre grand d’espectators que van e venon sens relambi, comprés long de la partida, per tornar faire lo plen als multiples estanquets! L’espòrt, aquò balha set!
 
- En campionat. Coma se sap, la partida Carcassona-Avinhon èra remesa per decision municipala de non-utilizacion del terren! (La pelena de Domèc es freula que se pòt pas creire, alara que se joguèt a Limós, Lesinhan, Vilagalhenc...!!???) Los Dragonets acabèron a paritat amb limós a L’Agulha (20-20), Tolosa anèt ganhar a Lesinhan (30-18), e Palau ganhèt sus Vilanuèva: 36-24.
 
— Proesa. Pel segond torn de la Copa de França, doas esquipas de nacionala 1 eliminan doas formacions d’Elèit 2: l’esquipa de Vilagalhenc-Argon se qualifica mercé a sa victòria fàcia a Vilafranca de Roergue, 28-26, coma los Batalhièrs de Pià contra Sent Gaudenç, 30-14.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article