Eth hestau organizat peth Ostau Comengés qu'a enguan un bon bilan, mès que mès pr'amor dera qualitat deths intervengueires, dera organizacion e deth beròi temps. Que i a participat un public diversificat, composat sustot de Comengesis, mès tanben de fòrça gents vengudas de Coserans e País de Fois, d'Armanhac, de Bigòrra, de Biarn, de Val d’Aran, mès tanben deths Païsis Catalans e quitament deths Estats Units.
Eth Passa-Ports que s'agís d'uas jornadas organizadas peth
Ostau Comengés damb un programa arric en teatre, projeccions, estagis de dança, cant lenga e musica. En plat de resisténcia era caminada aperada 'Era Hlama Occitana', damb ua participacion de 170 caminaires e era Serada Occitana damb mès de 300 personas en un bal animat per Calhats e Brotto-Lopez.
En hestau totas eras generacions que i son estadas arrepresentadas damb dançaires, musicaires, cantaires, caminaires, amators de corsa a pè o tot simplament amorosis dera lenga e dera cultura occitanas.
Eths mès joenis qu'an jogat un ròtle important ena Jornada deths Gafets, a on 350 escolans qu’aprenguen eth occitan deth primari ath licèu que participèren en ua trobada damb activitats coma eth concors de condes, eth teatre e eras quilhas de 6.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari