Lo president espanhòl, Mariano Rajoy, e lo francés, François Hollande, signèron dijòus passat l’acòrdi qu’establís definitivament la connexion dirècta de TGV entre Barcelona e París a partir del 15 de decembre. Es un eveniment istoric que far culminar un projècte començat en 1992.
 
Aquel projècte “aprigondís las excellentas relacions de vesinatge” entre França e Espanha, “e referma Catalonha coma ais del sistèma d’interconnexions” entre los dos estats, segon Rajoy. Lo president espanhòl a definit l’acòrdi coma “un vertadièr succès istoric per las interconnexions” amb França e a remarcat que l’acabament del TGV permetriá de connectar amb granda velocitat Espanha e la rèsta d’Euròpa.
 
De son costat Hollande se n’es felicitat tanplan: “Es una granda reüssida”, çò a dich, en apondent qu’a “calgut vint ans” per qu’aquela linha venga una realitat. La decision de metre en marcha aquel camin de fèrre se prenguèt en 1992.
 
 
Frequéncias e prèses
 
Renfe e l’SNCF an ja començat de vendre los bilhets. Lo servici començarà lo 15 de decembre amb cinc trens cada jorn, dos entre Barcelona e París, un entre Barcelona e Lion, un entre Barcelona e Tolosa e un entre Barcelona e Marselha, provenent de Madrid. D’aquela manièra, la granda velocitat cobrirà dètz e sèt vilas. Barcelona serà a tres oras de Tolosa, e a un pauc mai de quatre oras de Marselha.
 
Tocant los prèses, los bilhets mai economics son los que fan lo trajècte entre Barcelona e Tolosa, que se pòdon crompar a partir de 39 èuros. Lo trajècte Madrid-Marselha, de sèt oras, se pòt far a partir d’89 èuros. Viatjar entre Barcelona e París costarà de 59 èuros en amont, e lo trajècte durarà un pauc mens de sièis oras e mièja.
 
Lo tren Barcelona-París farà d’arrèstes a Girona, Figueres, Perpinhan, Narbona, Montpelhièr, Nimes e Valença. Lo Barcelona-Marselha, provenent de Madrid, s’arturarà a Girona, Figueres, Perpinhan, Besièrs, Montpelhièr, Nimes, Avinhon e Ais de Provença.
 
Amb aquò, las vilas de Girona, Figueres, Perpinhan, Narbona, Montpelhièr e Nimes demoraràn connectadas amb quatre trens jornadièrs dins cada sens.
 
 
Decepcion pels oraris en Catalonha Nòrd
 
Per los oraris entre Perpinhan e Barcelona, la decepcion es arribada als catalans del nòrd. Segon L’Indépendant, los oraris son avantatjoses per aqueles que viatjaràn de Barcelona a Perpinhan perque poiràn partir a 9h del matin e tornar a 22h. Per contra, dins l’autre sens serà fòrça mai complicat de passar una jornada completa a Barcelona en avent lo primièr tren a 10h amb lo retorn a 18h26. Ça que la, l’SNCF assegura qu’en 2014 s’establirà de nòvas frequéncias.