Una còla internacionala de scientifics a descobèrt que los limacs de mar s’escotèlan mutualament al cap pendent lo sèxe. L’estudi, qu’es estat publicat dins Proceedings of the Royal Society B, conclutz que l’acoblament dels limacs de mar comença, coma per fòrça autres animals, amb un jòc doç entre los dos membres, mas, qualques segondas après èsser ensems, los dos s’escotèlan mutualament al cap amb una sòrta de ponchon que sortís del pènis. Es alavetz qu’injèctan de substàncias quimicas dirèctament al cervèl de l’autre per li cambiar la conducha en benefici pròpri. Lo resultat es que los animals demòran blocats amassa pendent 40 minutas.
 
Malgrat que totes los limacs sián ermafrodits, cada membre del parelh rivaliza per èsser lo mascle pendent l’acoblament e èsser lo que fegondarà lo companh escotelat, que ven la femèla.
 
Pels cercaires, s’agís d’un “comportament excepcional d’acoblament traumatic”. Los limacs de mar estudiats, de l’espècia “Siphopteron sp. 1”, an una longor d’entre 2 e 4 millimètres e son pas los sols qu’injèctan de substàncias quimicas a lors companhs pendent la copulacion. Ça que la, los cercaires an conclús qu’es lo primièr cas conegut que se fa totjorn al cap.