Las manifestacions de l’oposicion en Tailàndia an forçat la primièra ministra a dissòlver lo Parlament e convocar d’eleccions generalas lo pus lèu possible, segon çò qu’anoncièt la quita primièra ministra, Yingluck Shinawatra, qu’espèra qu’aital s’acaben las protèstas.
 
Mas l’oposicion e los manifestants an considerat qu’amb aquò n’i a pas pro, e mantenon la demanda que lo govèrn demissione. Dison que l’executiu es corromput e que contunharàn la lucha fins a lo fòrabandir.
 
Shinawatra convoquèt las eleccions anticipadas l’endeman que los deputats del principal partit de l’oposicion demissionèsson e rejonguèsson las manifestacions per carrièras contra lo govèrn. Lo cap del partit demissionant avalorèt positivament l’anonci e diguèt que participariá al vòte.
 
Las protèstas contra lo govèrn son multitudinàrias en Tailàndia dempuèi las darrièras setmanas. Los rambalhs derivats d’aquelas protèstas an provocat almens la mòrt de cinc personas e gaireben 300 ferits. Los manifestants acusan la primièra ministra de governar jos los òrdres de son fraire, Thaksin Shinawatra, autoexiliat en Dubai en seguida del còp d’estat de 2006 que lo reversèt, e condemnat per corrupcion en son abséncia.