Uruguai es vengut lo primièr país del Mond a regular per lei la produccion, la venda e lo consume de la marihuana o del cannabis, es a dire del cambe.
 
Lo senat aprovèt dimars passat, après un long debat, una mesura qu’obtenguèt 16 vòtes en favor e 13 contra. La mesura deu èsser confirmada ara pel president José Mujica, que promoviá l’iniciativa dempuèi un an.
 
Cal dire que dempuèi los ans 1970, fumar de marihuana èra legal en Uruguai, mas èra illegal de ne cultivar e de ne vendre. Ara, amb la nòva lei, l’estat regularà tot lo procès de produccion, distribucion e venda. Permetrà, tanplan, que totes los majors d’edat que s’inscrigan en un registre especial ne pòscan cultivar sièis plantas o ne crompar fins a quaranta gramas mesadièrs dins las farmacias autorizadas.
 
Ça que la aquela mesura s’aplicarà solament als ciutadans del país e non pas als toristas ni als estrangièrs. Amb aquela nòrma lo president cèrca d’ensajar una alternativa a la tradicionala politica de lucha contra las drògas. Se foncionèsse pas, lo govèrn s’es engatjat a revisar la nòrma.