Coma èra de preveire, la cap de l’esquèrra chilena Michelle Bachelet a ganhat lo segond torn de las eleccions presidencialas dimenge passat e tornarà governar lo país. O a fach amb fòrça clartat en atenhent 62% dels vòtes contra lo 38% de son adversària Evelyn Matthei.
 
Pasmens cal prene en compte, coma o soslinha ben Vilaweb, l’abstencion fòrça nauta, qu’es arribada a 59% del cens.  Aquela abstencion s’interprèta coma una critica generalizada del sistèma dels partits mas, tanben, s’explica pr’amor qu’es lo primièr còp que votar es pas estat obligatòri en Chile.
 
Bachelet prendrà lo poder al mes de març que ven, coma o establís la constitucion chilena, e serà presidenta fins en l’an 2017.
 
Dins son primièr discors coma presidenta elegida, Bachelet afirmèt que dirigiriá de reformas importantas e parèt la man als autres partits de l’esquèrra chilena per que sostenguèsson lo govèrn.
 
Segon çò que rapòrta Nationalia, un dels prètzfaches de Bachelet es la redaccion d’una novèla constitucion que reconeisserà los pòbles originaris, istoricament marginalizats. Segon la presidenta, l’estat “deu protegir, promòure e assegurar los dreches individuals e collectius dels pòbles indigènas”. De lor costat, las organizacions dels pòbles originaris, mai que mai los mapuches e los rapanuis, reclaman mai de causas concretas.