L’agéncia espaciala estatsunidenca (NASA) a previst de plantar de naps, de baselic e d’autras èrbas sus la Luna. Amb aquela experiéncia vòlon obténer d’informacions sus l’eventuala subrevivença de las plantas dins aquel encastre e analisar la possibilitat que los umans i poscam viure. “S’i mandam de plantas e se prospèran, es probable que la vida siá possibla” sus la Luna, çò ditz la NASA sus son sit. Las plantas serián necessàrias perque aportarián d’oxigèn e de mangisca als futurs abitants del satellit, e tanben de “confòrt psicologic”, çò dison, a partir dels estudis realizats en Antartida e dins l’Estacion Espaciala Internacionala.
 
De fach, s’es ja fach d’estudis de creissença de plantas dins de concidions de microgravitat dins l’Estacion Espaciala Internacionala, mas sus la Luna i auriá, de mai, lo risc dels efièches de la radiacion presenta ailà, çò dison.
 
Se capitan de far grelhar las plantas, encara segon la NASA, i aurà los factors environamentals minimals per la creissença normala. Se subrevivon 14 jorns, se demostrarà que las plantas se pòdon desvolopar dins l’entorn de la radiacion de la Luna. E se subrevivián 60 jorns, se demostrariá que la reproduccion sexuala de las plantas lai se pòt realizar.
 
Menaràn a tèrme aquel projècte en 2015. Los expèrts son a desvolopar una cambra de creissença que permetrà lo grelhatge de las plantas. Un papièr de filtre amb de noiriduras dissolgudas las ajudarà a créisser coma sus la Tèrra. Fotografiaràn las plantas a intervals per n’analisar l’evolucion.