Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcAlbigésCastrés

Rugbi: lo match Castras Olimpic-Leinster mostrarà Occitània al Mond

Lo Centre Occitan del País Castrés, las assocacions esportivas e la premsa locala organizan una animacion occitana de las bèlas lo 12 de genièr que ven dins l’encastre de l’H Cup

| Franz-M
L’occitan serà plan present dins lo rugbi, a Castras, lo 12 de genièr que ven. Lo Centre Occitan del País Castrés e las associacions partenàrias —Puissance Castres, Les Amis du Rugby e l’Amicale— se son mes al trabalh per far plan presenta la lenga e la cultura del país dins un dels espòrts mai populars en Occitània. Per començar, las animacions occitanas se prepausan a l’ocasion d’un encontre internacional qu’afrontarà lo Castras Olimpic (CO) e l’esquipa irlandesa de Leinster, dins l’encastre de l’H Cup. L’encontre aurà luòc a 13h45 a l’Estadi Pierre-Antoine de Castras.
 
Aital a començat la distribucion de bandièras bèlas, de balons, de capas e de mocadors estampilhats amb la crotz occitana que se pòdon crompar al Centre Occitan del País Castrés per 3 èuros. Al delà, de milierats d’afichas se van difondre dins totes los comèrcis de la vila e lo setmanièr Le Journal d’Ici publicarà de tèxtes explicatius sus la lenga occitana, las paraulas de l’imne occitan que cantarà tot lo public ensems sul terren de jòc, e una presentacion dels instruments tradicionals del país: lo graile e la cabra, tanben apelada bodega. De fach, de grailaires e de bodegaires faràn conéisser las musicas e las danças del país pendent l’eveniment.
 
Es una escasença màger per nos far conéisser al Mond coma occitans, dins una partida internacionala, vista la preséncia radiotelevisiva de l’eveniment esportiu. “Se uèi l’occitan se met al rugbi, benlèu que deman lo rugbi se metrà a l’occitan… Alara, fe dins l’avenir, totes ensemble CO-ÒC!”, çò ditz Pèire Thouy dins lo comunicat de premsa del Centre Occitan del País Castrés.
 
La còla de Jornalet saludam aquela iniciativa, e encoratjam a totes los legeires a vesitar Castras lo 12 de genièr que ven e a anar al terren de rugbi per mostrar, a tot lo mond que veiràn aquela partida, que sèm occitans.



_____
Cercle Occitan del País Castrés
“Ostal d'Azalais”, 6 carrièra del Consulat
81100 CASTRAS
+33 (0)5 63 72 40 61
patrimoni@wa...

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gèli Grande Lairac en Agenés
10.

#9
Es pas la bandièra del PNO.
Foguesse la bandièra del PNO aquò voldria dire que lo PNO auria de centenats e de milierats d'aderents e de sufragis e que lo nacionalisme independentista seria mai potent que çò qu'es a l'ora d'ara.
Vertat es qu'es estada creada pel Francésc FONTAN mas dempuèi un fum de monde l'an represa que son pas al PNO e tant melhor, qu'una bandièra nacionala es pas la proprietat d'un partit quin que siaga es la proprietat del pòble de la nacion que se reconeis dins aqueste simbèu.

  • 2
  • 0
Mathieu Castel Marselha
9.

#7 L'argumentacion se ten.

Ai pasmens totjorn agut un pauc de mau amb aquelei que decidon per leis autres e que fan de son avejaire una veritat universala. Aquesta bandiera, a l'ora d'ara, es en ren la bandiera occitana "vertadiera", per tant qu'existe una bandiera tala. Es aquela dau PNO. Es pas parier me sembla...

Bòna annada a tu tanben (e a tot lo monde aicí !)

  • 2
  • 0
BOURDON Pau
8.

"Lo Centre Occitan del País Castrés e las associacions partenàrias —Puissance Castres, Les Amis du Rugby e l’Amicale— se son mesES al trabalh"

  • 1
  • 1
Gèli Grande Lairac en Agenés
7.

#5
I a ges de comunicat oficial.
I a sonque que quand vas per carrièras amb lo drapèl occitan sens l'estèla dels sèt rais lo monde i veson lo simbèu del Lengadòc e Lengadòc es pas Occitània tota
Occitània tota es Gasconha, Lengadòc, Provènça, Daufinat, Auvernha, Lemosin e Guiana.
L'estèla dels sèt rais (o astrada coma dison los felibres) es mai recampaira que la sola crotz dels comtes de Sant Gèli e de Tolosa.
Aquela bandièra simbolisa l'unitat de la nacion occitana dins lo respiech de tota sa diversitat. E res empacha pas degun de manifestar damb la bandièra nacionala d'Occitània e la bandièra de sa region occitana d'origina ... es çò que fau cada còp que vau manifestar per nòstra lenga e nòstra cultura.
E sabi que soi pas lo sol.
Bona annada per tu, per Jornalet, per tota la nacion Occitana e per totas las nacions del monde.

  • 4
  • 1
Pèire Cardenal Jr. Velai
6.

Polit trabalh de comunicacion per difusar l'imatge de l'occitan.

  • 2
  • 0

Escriu un comentari sus aqueste article