Castras decidit de receber los montpelhierencs a l'estadi Ernest Wallon de Tolosa. Qu'èra la revenja de l'an passat. Per Castras èra tanben lo tresau barratge consecutiu. Los dus purmèirs furen perduts. Mès ier los tarnés an dominats los lors adversaris dens tots los maines. Montpelhièr perdot sheis veishugas en tocar. 

 

Los lengadocians n'an pas tròp avut de possibiltats de préner lo jòc au lor compte. La pròva, a la sheisenta dus minutas Tekori prit un carton roge sevèr per un plaquatge dangerós. Fakate profeitèt per marcar un ensai a la sheisenta nau minuta e podot har créder que la partida d'èra pas acabada. Mès, l'eficacitat e la serenitat deus castrés 'us permiren de tornar préner la possession de la veishuga, de jogar en fàcia e de marcar sheis punts en detz minutas.

 

Dissabte 2 de junh, lo CO jogarà la semifinala a l'exterior contra l'estadi tolosenc a l'Stadium. 

Serà complicat davant peus castrés dab l'abséncia de Tekori expulstat. Cau véder si lo tresau linha, hòrt important dens lo sistemi tarnés Ibrahim Diarra aurà lo dreit de jogar après la soa sortida sus KO. Sordeish lo son remplaçant Malonga fut remplaçat per Capo Ortega per nafradura au genolh vint minutas apuèi la soa dintrada suu terrenh.

 

 

Los Racingmen, venguts dens lo Var dens l'amira de ganhar n'avèvan pas cambiat de recèpta au nivèu deu jòc. Era basat sus una bona defensa e una aucupacion deu terrenh de qualitat dab los pès de Steyn e Hernandez. A la trenta tresau minuta, los parisencs menèren 13 a 0 e n'i avèva pas grana causa a díser.

 

Mès en seconda tempsada, los tolonés saboren tornar au planchòt dab un cambiament de tustaire. En efeit Giteau remplacèt Wilkinson dens aqueth exerc. A la sheisanta dus minuta, los varés èran tornats viéner a 4 punts. Es a aqueth moment de la partida que David smith, sus una accion personau, passèt cinc defensors blu e blanc e joguèt un dus contra un dab Armitage tostemps au bon endreit per aqueth genre d'accions.

 

Dens las darrèiras minutas los racingmen manquèren dus penalitats. E sus la darrèira accion Gitau podot solatjar tot un pòble dab una navèra penalitat.

 

Dimenge 3 de junh Tolon jogarà contra Clarmont. Podem se demandar si lo capitani Joe Van Nierkerk sortit en seconda tempsada serà titular. L'entrenaire Bernard Laporta n'ei pas tròp content deu son nivèu de jòc actuau e podem véder dens la soa sortida prematura com una punicion.

Eric Goyhenne