Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Val d’Aran: laveg de vòtes per l’independéncia de Catalonha

La campanha “signa un vòte per l’independéncia” es estada una reüssida segon l’ANC

L’Assemblada Nacionala Catalana (ANC) a pausat mai de 700 taulièrs pertot en Catalonha e Aran, dins l’encastre de la campanha “Signa un vòte per l’independéncia”. Mai de 3000 apoderats e fòrça mai de volontaris an acampat de signaturas de ciutadans, amb lors noms, adreiças e numèros de carta d’identitat, que demandan al Parlament de Catalonha e Aran de declarar l’independéncia de faiçon unilaterala, en acòrdi amb lo drech internacional.
 
 
Reüssida en Aran
 
L’ANC Val d’Aran pausèt son taulièr sus la plaça de Vielha aquesta dimenjada passada (fòtos). Las signaturas de demandas foguèron fòrça mai nombrosas que çò que se demorava. “Dissabte ja auíem acabat es paperetes e mos calèc anar a cercar-ne en Palhars”, çò diguèt a Jornalet Mireia Boya, presidenta de l’ANC Val d’Aran.
 
Mas los bulletins de vòte qu’anèron quèrre en Palhars èran pas pus en occitan mas en catalan. “I auec molti aranesi que s’estimèren mès demorar entà poder votar en aranés”, çò apondiá Boya, que remembrèt qu’“ena Marcha Beret que ven ja ac poderam hèr ena nòsta lengua”, en referéncia a l’eveniment esportiu que començarà lo 2 de febrièr que ven en Aran, ont l’ANC Val d’Aran serà tanben presenta per acampar mai de signaturas.
 
Los occitans non araneses que vòlgan signar, o pòdon far s’an mai de 16 ans, en se desplaçant en febrièr fins a la Val d’Aran o en contactant l’ANC Val d’Aran.
 
 
Un plan B al referendum
 
Aquela accion es un dels cinc projèctes mai importants de l’ANC per l’an 2014. “Es un plan B en cas que la consulta se pòsca pas far”, çò diguèt a VilaWeb la coordenaira de l’ANC, Rosa Alentorn.
 
Lo document que lo mond an signat reclama als politicians “de far tot çò que poiràn, d’agotar totas las vias per far lo vòte”, e en cas que se pòsca pas far, de considerar cada demanda signada “coma se foguèsse un vòte per declarar l’independéncia”, en acòrdi amb lo drech internacional de peticion.
 
France 3 a fach un reportatge sus la collècta de demandas a Perpinhan.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Manèl Barcelona
3.

#2 Vòl dire "avalanca". Al 'petit diccionari castelhan-aranés-catalan-francés', Frederic Vergés raporta las formas aranesas: laueg, lavet, lavet, lits, litsa. E encara eslur e eslurràs, fòra de Val d'Aran.

  • 5
  • 0
Mathieu Castel Marselha
2.

De que vòu dire aquò "laveg" ? Fòrça ? Molon ?

  • 1
  • 0
Reinat Niça
1.

Si bolégan lu Aranés, fan melhor que nautres en particular en País niçard !

  • 5
  • 0

Escriu un comentari sus aqueste article