Lo ministre francés dels Afars estrangièrs, Laurent Fabius, a tanplan demandat la mobilizacion internacionala. Fabius a començat d'organizar una reünion dels aliats internacionals de l'oposicion siriana, los nomenats Amics de Siria, a París. E Kowait, país qu'a la presidéncia de la Liga Aràbia, a convocat una reünion d'urgéncia de l'organisme per examinar la situacion e decidir de mesuras per "metre fin a l’opression del pòble sirian".
 
De son costat, lo Conselh Nacional Sirian, qu'amassa plan de fòrças opausantas, qualifiquèt l'atac de "crime sistematic" e declarèt tres jorns de dòl. Al Haula es una vila de la província d'Hòms, un dels epicentres de la revòlta contra Al Asad. L'atac supausa una violacion flagranta dels tèrmes del cessament del fuòc establit dins lo plan de patz impulsat pel mediador de la Liga Aràbia e de l'ONU, Kofi Annan. Segon l'oposicion, l'atac comencèt amb dotze oras consecutivas de bombardaments", seguidas "d'un masèl comés per de leials e de mercenaris del govèrn". Mas lo govèrn sirian ditz que n'es pas lo responsable.

"Çò que s'es passat a Al Haula es un crime sistematic amb la tòca d'alucar lo fuòc sectari dins lo país", declarèt lo president del conselh, Burhan Ghalioun, que demandèt a Annan que se desplacèsse immediatament dins la vila per far testimòni del masèl. Sembla que la peticion serà escotada perque s'es anonciat qu'Annan arribarà uèi a Damasc per avalorar la situacion de rompedura sistematica de la trèva amb lo president Al Asad e amb de representants de l'oposicion.
 
Siria se manten dins estat de guèrra malgrat lo desplegament de dos cents cinquanta observaires de l'ONU per contrarotlar lo cessament del fuòc impulsat per Kofi Annan entre lo govèrn sirian e l'oposicion armada, e que s'es pas respectat.
                                    
Dempuèi lo començament de la revòlta, en març d'arunan, l'ONU calcula qu'almens dètz mila personas son estadas tuadas en Siria, e mai de vint mila son refugiadas dins de campaments en Turquia.