Bandièra01 capçalera  1180x150: Botiga

Actualitats

crotz-tolosaCreated with Sketch.ProvençaMónegueMónegue

Mark Webber ganhèt lo GP de Mónegue en tot resistir l'encauçament

Alonso se placèt cap del Campionat del Mond amb 76 ponches

Mark Webber ganhèt lo GP de Formula 1 de Mónegue
Mark Webber ganhèt lo GP de Formula 1 de Mónegue | iragazzidiredbull

Mark Webber ganhèt ièr dimenge lo GP de Formula 1 de Mónegue. Nico Rosberg foguèt lo segond e Fernando Alonso pugèt al pòdium en tresen lòc mas per ponches se plaça cap del Mondial. La pluèja qu'arribèt a la fin de la corsa portèt l'emocion a una competicion palpitanta.


Se ditz que qui sortís lo primèr al GP de Mónegue serà lo qui ganharà, e aital se debanèt ièr al principat. Lo pilòt de Red Bull, Mark Webber ganhèt una corsa palpitanta que vegèt los darrièrs dètz torns amb sièis pilòts a mens de cinc segondas de diferéncia. La corsa se gropèt mai encara quand la pluèja arribèt al torn 69. Webber resistiguèt l'encauçament e poguèt pujar al mai naut del pòdium, seguit de Rosberg e d'Alonso. 

 

L'australian dominèt la corsa, en aprofechant que foguèt lo solet a poder rodar amb la pista liura pendent tota la corsa, e mai se foguèsse encauçat en tot moment per Nico Rosberg e per Fernando Alonso. Lo de Red Bull dintrèt a sièis desenas de segonda de l'alemand de Mercedes. L'asturian arribèt lo tresen, a un segond e mièg de Webber e se plaça cap del Campionat del Mond amb 76 ponches, tres per dessús de Webber e de Vettel. 



Lo quatren foguèt Sebastian Vettel, qu'alonguèt fòrça la siá primièra intrada a l'estand d'avitalhament per redusir cinc posicions (sortissiá lo noven), del temps que Hamilton, que sortissiá lo tresen, arribèt lo cinquen. Los McLaren an pas plan corregut en un circuit que normalament lor es favorable.

 
L'arpitan de Lotus, Romain Grosjean aguèt un accident amb lo catalan Pedro Martínez de la Rosa qui se deguèt retirar al tresen torn per aver la veitura en pana. Los autres qu'acabèron pas la corsa son Button, Pic, Ricciardo, Schumacher, Petrov, Kobayashi, Maldonado e quitament Grosjean.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article