Bandièra01 capçalera  1180x150: Novestivada

Actualitats

Trenta ans del 1984 d’Apple

Lo 22 de genièr de 1984, la companhiá californiana presentèt la revolucionària linha d’ordenadors Macintosh, amb un anonci tanben innovant, signat per Ridley Scott

Lo 22 de genièr de 1984, a la pausa de la finala de la Super Bowl, s’emetèt per television un anonci tant innovant coma lo produch que presentava. Amb 1984 (dirigit per Ridley Scott), la jove companhiá d’ordenadors Apple anonciava lo Macintosh (reconstitucion), lo primièr ordenador personal orientat vèrs lo consumaire, amb sa mirga e l’interfàcia grafica. Steve Jobs (1955-2011), lo president de la societat californiana, lo presentèt dos jorns puèi.
 
O faguèt dins una de sas celèbras presentacions sus l’empont (vidèo), al Flint Center de Cupertino (Silicon Valley), al meteis endrech ont uèi, dissabte, se remembran dels trenta ans del Mac.
 
Lo primièr Mac, que partissiá de l’experiéncia acomolada per Apple dempuèi sa fondacion en 1976 (vidèo), costava 2495 dolars e aviá una memòria de 128 Ko (cal dire qu’a l’epòca, l’estandard èra de 64 Ko). Aquel ordenador compacte avançava ja la simplicitat d’usatge e lo dessenh sonhat qu’an acompanhat los produches d’Apple dempuèi, del PowerBook a l’iMac e al MacBook, en passant per l’iPod, l’iPhone e l’iPad. Apple es arribat a son trenten anniversari en plena forma (es la primièra marca mondiala, segon lo darrièr classament del gabinet consultant Interbrand), mas sens son arma, Steve Jobs, que moriguèt lo 5 d’octòbre de 2011.
 
 
Jobs e Apple
 
La relacion de Steve Jobs amb Apple foguèt pas totjorn tant intima, totun. Sonque un an après lo lançament del Macintosh, Jobs deguèt quitar l’entrepresa (qu’el aviá fondada a vint e un ans amb Steve Wozniak) per de desacòrdis amb la rèsta de la direccion. Après aquela separacion, Apple faguèt evolucionar sos produches, mas l’enòrma concurréncia (mai que mai de Microsoft) menèt la companhiá a la crisi. De son costat, Jobs capitèt pas gaire ben amb sa nòva firma, NeXT.
 
Pendent lo vinten anniversari d’Apple, en 1997, se produguèt lo rescontre: l’ostal de la poma crompèt NeXT per n’emplegar lo sistèma operatiu, l’OpenStep, coma ponch de partença pel Mac OS X. L’aqueriment implicava lo retorn de Jobs, primièr coma conselhièr e après coma president d’Apple. Calguèt solament un an per que l’entrepresa de Cupertino revolucionèsse lo mercat un còp de mai, amb la presentacion de la linha colorada iMac. Començava l’actuala epòca d’aur d’Apple, gràcias a la vision de futur de Jobs e als espectacloses dessenhs d’un jove creatiu anglés, Jonathan Ive. Aqueles dos son los responsables del succès de l’iMac, lo PowerBook, lo MacBook, l’iPod, l’iPhone e l’iPad. 



Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pimflòid
4.

#3 Quiò! E Sega tanben!

  • 2
  • 0
Sega es mai fòrt que tu !
3.

#1 Amiga, un produch al nom occitan ?

  • 2
  • 0
Pimflòid
2.

Qu'aví un amic "riche" qui avè un amiga quand èri pichon! Qu'èri gelós com un pedolh!!!

Tant i a que digoi aus parents que volí un ordinator...

A la mea comunion qu'avoi un Amstrad 6128!
(los qui coneishen las duas maquinas que compreneràn :-)

  • 2
  • 0
Mathieu Castel Marselha
1.

l'an que ven serà lo 30en aniversari de la sortida de l'Amiga. Espèri un article encara mai lausengier per un ordinator ben mai avançat tecnicament que lo Macintosh !

  • 4
  • 0

Escriu un comentari sus aqueste article