Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc NautTolosan

Tolosa. Un fast food amb un cap tres estelas Michelin

| Alexandre Lardeur
Un dels melhors cosinièrs occitans se lança dins lo fast food. Michel Bras, lo cosinièr roergàs qu’a obtengut tres estelas Michelin dempuèi quinze ans, inaugurèt dijòus passat al centre de Tolosa un restaurant de manjar rapid per mostrar que se pòt manjar lèu e a bon mercat tot en se regalant de bons produches.
 
L’establiment s’apèla Capucin precisament perque prepausa de capuchins, es a dire, de galetas conicas fachas de farina e de froment, farcidas de carn de buòu, de carnsalada, de cambon, de formatge de Ròcafòrt o de La Guiòla. “Voliái crear una cosina que metèsse endavant los produchors locals, 70% son originaris de Roergue, perque i a dins la region un potencial que cal esplechar”, çò diguèt Bras. Lo capuchin que prepausa lo cosinièr del país dels Grands Causses, se pòt acompanhar d’una sopa, e coma dessèrts se prepausa de tarta rajanta, de copetada e de prunas amb de mossa caramèl.
 
Michel Bras es un cap de cosina fòrça conegut que se caracteriza pel tractament que fa a la natura dels aliments. El e son filh tenon un restaurant e una ostalariá a La Guiòla (Aubrac) e en Japon. Aprenguèt de cosinar de sa maire, que li ensenhèt de far l’aligòt amb lo mestritge dels tempses classics.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article