Bandièra01 1180x150: Comuna de Tolosa

Actualitats

Tornem suu “dia de colèra” a París

| Jour de Colère

Lo 26 de genièr passat se debanèt a París una manifestacion de 17 000 personas segon la polícia e 120 000 segon los organizaires, que demandèt la demission de François Hollande, a l’iniciativa d’un nòu collectiu francés d’extrèma drecha nomenat Jour de Colère (jorn de colèra).  E mai se s’agís d’una nòva de fa mai de doas setmanas, Pascau Sebat nos prepausa de tornar sus aquela informacion que los mèdias franceses l’an tocada a la lèsta e que Jornalet ne parlèt pas.


Lo 26 de genèr, a París, ua manifestacion de 17 000 personas segon la polícia e 120 000 segon los organizaires que demandè la demission de François Hollande a l’iniciativa d’un collectiu navèth dens l’extrèma dreta francesa: Jour de Colère (dia de colèra) . Aqueste collectiu que sembla de voler federar l’extrèma dreta contra François Hollande en balhant un vam navèth a l’oposicion au maridatge per tots.
 
“Qu’avem tots aumensh ua rason d’estar en colèra contra aqueste gouvernament qui n’escota pas lo pòble, matraca los contribuents, ahàmia los nostes païsans, entèrra la nosta armada, libèra los delinquents, desorienta los nostes mainatges, perverteish lo noste sistèma escolar, demeseish  las nostas libertats, assassina la nosta identitat, destruseish las nostas familhas”, ce ditz lo manifèst deu movement.
 
Un discors plan lis e consensuau si’u comparam dab çò qui’s digó e qui’s hasó per las carrèras de París aqueth dimenge plojós: eslogans coma “Jornalistas, hilhs de putas”, “judius hòra França”, “Faurisson qu’a rason” o “CRS, revira’t: la racalha qu’ei darrèr tu” que s’i hasèn enténer.
 
Los jornalistas oficiaus de las cadenas francesas n’èran pas plan venguts dens lo cortegi e ua esquipa de Canal Plus qu’estó fisicament agressada per manifestants.
 
Un reportatge d’Independenza TV[1] que muisha la preséncia de monde e d’organizacions hèra desparièrs: joens opausants au maridatge per tots de l’anar meilèu borgés e tranquil, dont ua ditz que ne vòu pas deishar François Hollande destrusir la familha, Civitas, Printemps Français, e un cortegi aperat Dissidence Française darrèr ua banderòla “Vivement le putsch” (“que’ns triga lo putsch”).
 
Un òmi davant la banderòla, qui tien un megafòn, que n’explica mei:  “Vivement le putsch, qu’ei simple: la tòca qu’ei d’inocular a la populacion l’idèa d’un còp d’estat militar, per’mor uei, qu’ei la sola solucion au noste vejaire. Lo vòte qu’ei tot de bon inutil. Fin finala qu’ei lo quite sistèma qui s’arrenovèla per eleccions de farlabica e donc l’armada uei qu’ei la sola institucion qui n’ei pas dissolvuda com la familha e qui pòt reagir en hant càder lo regim... e restaurar l’Estat, solide.”
 
A un aute endret deu seguici, un joen que hè un salut nazi.
 
Los mèdias francés que parlèn hèra chic d’aquera manifestacion, çò qui ne manquèn pas de remarcar los blogaires simpatizants. Paur d’un subjècte complicat, volontat de non pas hà’s relais de paraulas xenofòbas o extremistas, interès superior entà la vita privada deu president e de la soa èx... Que’ns podem interrogar sus la loa motivacion a non pas acordà’i importància e l’emission Le secret des sources sus France Culture que consacrè ua òra a analisar lo tractament minimalista d’aqueste eveniment e d’autes ligats a l’extrèma dreta per la premsa francesa.
 
 
 
 
Pascau Sebat




_____
[1] N'èi pas podut destriar la relacion entre Independenza TV e los manifestants. Que's defineishen com jornalistas ciutadans e "desintoxicacion mediatica". 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pascau Sebat
2.

#1 Mercés per aqueste complement!
Le Petit Journal, qu'estón eths qui estón agressats.
Lheu ei per'mor d'aquò que'n parlan hèra.
Segon Le Secret des Sources, que i avè hèra chic de jornalistas qui "cobrín" l'eveniment e lo chic qui i avè ne gausavan pas sortir nat materiau per'mor de la páur.

Cau díser tanben que hèra de faishistas espian e coneishen los jornalistas qui ahiran. Atau Caroline Fourest que's hasó reconéisher ("C'est Caroline Fourest!"), miaçar/insultar ("Cours, sale pute!") e agressar pendent ua manif de Civitas contra lo maridatge gay.

Vist que n'èi pas la telé, ne sèi pas tròp si cau relativisar la culpabilitat deus jornalistas paurucs/prudents o saludar lo coratge deus de Canal +...

  • 0
  • 0
Joan-Marc LECLERCQ
1.

Lo medish ser, sus França 2, ne parlèn pas, sonque entà díser qu'i avoc incidents e castanhas per la fin. Per contra Canal + na parlat (Le Petit Journal) e ne parla encara, véser Ariel Wizman qui'n hè una cronica cada jorn (Dens "la Nouvelle Edition de cap a 13h50).

  • 5
  • 0

Escriu un comentari sus aqueste article