Bandièra01 capçalera  1180x150: Novestivada

Actualitats

De manifestacions contra lo projècte de lei espanhòl sus l’avortament

Delà la protèsta multitudinària de Madrid, i aguèt una manifestacion a París. En Occitània manifestèron a Bordèu, Tolosa e Marselha

Qualques desenats de milièrs de personas manifestèron dissabte a miègjorn per carrièras, a Madrid, contra la lei sus l’avortament del ministre espanhòl de la justícia, Alberto Ruíz Gallardón. La protèsta, convocada pel movement nomenat Tren de la Libertat, demandèt la derogacion del projècte de lei e la demission del ministre “pr’amor que cèrca de far recular l’avortament quaranta ans enrèire”.
 
La manifestacion comencèt a la gara de trens d’Atocha, ont s’amassèron de manifestants de pertot que i èran arribats en tren e en autobús. Ailà se faguèt un acte prèvi a la manifestacion amb l’intervencion dels principals sindicats, de formacions politicas d’esquèrra, l’associacion asturiana Comadres, la plataforma Nosotras Decidimos (nosautras decidissèm) e qualques personalitats del sector cultural.
 
La manifestacion s’acabèt davant la bastissa del Congrès dels Deputats, ont de representants de l’organizacion enregistrèron lo document entitolat “Perque ieu decidissi”, que defend lo drech de las femnas de decidir lor maternitat.
 
 
A París
 
Manifestèron tanben aperaquí 5000 personas per carrièras a París, e mai dins 35 autras vilas de l’estat francés, contra lo projècte de lei espanhòl sus l’avortament.
 
La protèsta aguèt lo sosten de qualques sindicats, del Partit Socialista (PS), del Partit Comunista (PCF) e d’Euròpa Ecologia-Los Verds (EELV). Ça que la, la participacion de politicians èra escassa mentre que la preséncia de militants feministas e de las ONG èra plan importanta.
 
Demest los politicians i aviá de candidats a las eleccions municipalas de París e de 20 arredondiments de la capitala francesa, qualques deputats e lo secretari general del PCF.
 
Pasmens, las protagonistas notablas de la manifestacion èran las militantas de Femen, un desenat de joves femnas que faguèron lo percors amb lo pitre nud en cridant “l’avortament es sagrat” dins qualques lengas.
 
La protèsta se debanèt dins un ambient festiu, partiguèt de la Plaça Joffre a 14h00 e anèt fins a l’ambaissada espanhòla.
 
Ja en decembre passat, la ministra francesa dels dreches de las femnas e pòrtavotz del govèrn francés, Najat Vallaud-Belkacem, escriguèt una letra al govèrn espanhòl en exprimissent son “chepic prigond” per aquel projècte de lei.
 
 
En Occitània
 
A Bordèu, qualques centenats de personas marchèron de la Plaça de la Comèdia fins al consolat d’Espanha per mostrar lor refús del projècte de lei del Partit Popular espanhòl. Un projècte que concernís tanben indirèctament las femnas del nòstre país, segon los manifestants. Ja l’11 de genièr passat avián manifestat mai de 300 personas lor solidaritat amb las femnas espanhòlas.
 
A Tolosa manifestèron almens 400 personas dimècres passat davant lo consolat espanhòl. Los manifestants planhián la supression del drech a l’avortament en Espanha e refusavan l’imposicion d’un “òrdre moral”.
 
A Marselha, la manifestacion amassèt dissabte qualques milièrs de personas. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lutz
1.

Per Tolosa, i aviá a l'entorn de 1000 personas, e non, avèm pas pogut passar davant lo Consulat, la polícia blocava la carrièra.

  • 1
  • 0

Escriu un comentari sus aqueste article