L’umorista francocameronés, polemic per aver inventat un gèst considerat antisemita, a l’intrada enebida al Reialme Unit. I voliá anar per sosténer Anelka, lo fotbolaire que pòt èsser sancionat per aver celebrat un gòl amb aquel gèst.
L’umorista francocameronés Dieudonné M’bala M’bala, dich Dieudonné, es enebit d’intrar al Reialme Unit segon çò qu’anoncièt ièr un pòrtavotz de l’Home Office, qu’apondèt que “la ministra de l’interior cercarà d’expulsar del Reialme Unit tota persona s’ela considèra que i a de rasons politicas o de seguretat publica necessitant d’o far”.
Segon l’agéncia Press Association, l’umorista comptava anar a Londres per sosténer Nicolas Anelka, l’esportiu de l’esquipa de fotbòl de West Bromwich Albion (WBA), que risca d’èsser penalizat amb cinc partidas sens jogar per aver celebrat un gòl en fasent una “quenelle”. Aquel gèst que Dieudonné meteis inventèt es considerat coma una simulacion del salut nazi per d’unes, e coma un simple gèst iconoclasta per d’autres.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
A, Dieudonné ! Quand comencèt, n’èri un fan. Aquel ὸme, o cal dire, es una bèstia d’empont, un comedian extraordinari. Sos primièrs esquetches sus los comunautarismes èran non solament de cacalassar a se tustar lo cuol per sὸl, mas èran tanben inteligents…E puèi, a bèles paucs, l’ai vist cambiar, se radicalizar…talament que finiguèt per dire de frasas que francament me fasián pas pus rire. Pasmens ai contunhat de lo voler comprene. Al cap d’un moment, avoèri que i compreniái pas res pus, a son posicionament . Es clar que ara dins sos espectacles i a d’antisemitas primaris e clarament identificats. El, Dieudonné, ai encara un dobte, benlèu qu’es pas qu’un ὸme nafrat que s’es enregdit. Sabi pas çὸ qu’a dins la tèsta. Mas lo dobte es pas pus permés, ara, per una part de son public (mirgalhat, d’alhors. Reüssiguèt d’acampar de corrents antisemitas de totas sorgas). Pὸdi pas aderar a la vièlha luna del complὸt judeὸ-maçonic que nos servís ara… « Shoah ananas » es indefendable. Vèsi pas perdequé los que sostenon la causa palestiniana, coma ieu, se sentirián forçats de mancar de respècte a las victimas dau chaple de la Shoah, coma per una mena de compensacion cinica.
Ai soscat sul fach se caliá enebir sos espectacles o non. Me pensi que non. Mas es estat fach. Es doncas victimizat, jὸga d’aquὸ, e sustot es un precedent. Qual pὸt afortir que ara un artista serà pas enebit a la demanda d’un grop, qual que siá ? En mai d’aquὸ, gitar quauqu’un en preda, en pastura, es pas dins ma natura. Fàcia a Dieudonné de ara aimi melhor lo silenci.
Quina contraproductivitat !
Lo Dieudonné acusa lo "sistèma" de restrénher la libertat deus ciutadans.
Aqueth afar d'Anglatèrra per una quenèla le va balhar rason.
Pas de qué se regaudir.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari