Las Nacions Unidas (ÒNU) an exigit que lo Vatican retire immediatament totes los clergues suspèctes o implicats en de cases d’abuses sus menors e que los pòrte davant la justícia. Dins un rapòrt del Comitat dels Dreches de l’Enfant, l’ÒNU soslinha que la Santa Sès “a pas reconegut los crimes comeses, [qu’]a pas pres de mesuras per afrontar los cases d’abuses sus menors e protegir los enfants, e [qu’]a adoptat de politicas e de practicas qu’an menat a contunhar los abuses e l’impunitat de lors perpetrators”. Lo comitat demanda al Vatican d’ofrir tota l’informacion qu’aja sus aqueles crimes, e planh que los cases d’abuses “son gaireben pas jamai notificats a las autoritats”. Dins son rapòrt, l’ÒNU critica que lo Vatican “a mes la reputacion de la Glèisa e la proteccion dels perpetrators davant los interèsses dels enfants”.
 
Lo rapòrt de l’ÒNU demanda que la comission que lo Papa Francés a creada per metre en examen los abuses collabòre amb la societat civila e que se centre tanben “sus la conducha de l’ierarquia catolica” e sus coma se tractèt los cases. Segon lo Comitat dels Dreches de l’Enfant, lo “còde de silenci” dins la Glèisa ajudèt per que los cases d’abuses s’amaguèsson o se denoncièsson pas.
 
Los expèrts de l’ÒNU planhon dins lor enquèsta que i a agut de clergues implicats en de cases d’abuses “dins lo Mond entièr” e que i a de desenats de milièrs de victimas. Dins aquel sens, critican que la Glèisa Catolica favorize la mobilitat dels pedofiles, e alèrtan que, segon lors recèrcas, “d’enfants de fòrça païses son davant un naut risc de patir d’abuses sexuals, perque de dotzenats de perpetrators son encara en contacte amb d’enfants”.
 
Lo tèxt del comitat es arribat après que, lo mes passat, una delegacion del Vatican compareguèsse per parlar dels cases d’abuses sus menors dins la Glèisa Catolica.