Uèi fa un an del barrament de Palm de Nas, una librariá tan pichona coma mitica del Quartièr Latin de París especializada en lengas romanicas, amb una atencion especiala als libres en occitan e en catalan. La rason del barrament, çò expliquèt alavetz l'encargat, Jean-François Coche, foguèt que lo proprietari del local voliá multiplicar per tres lo prètz del loguièr. Coche tenguèt quatre ans a i resistir, mas fin finala barrèt, decebut per l'indiferéncia de la Delegacion de la Generalitat de Catalonha en França, de l'Institut Ramon Llull e del Centre d'Estudis Catalans de la Sorbona. Un an après, aquel parisenc amorós de la nòstra cultura rapòrta que s'es pas alonhat dels libres: a tornat prene l'activitat sul mercat del libre vièlh e d'ocasion del Pargue Georges Brassens de París.
 
Coche a logat un taulièr dins aquel mercat del libre, plaçat al 104 de la carrièra de Brancion, que dobrís los dissabtes e los dimenges de nòu oras del matin a sièis oras del ser. Alavetz, las dimenjadas i pòrta qualques centenats de libres, que n'i a totjorn, e "fòrça visibles"', en catalan e en occitan.