En Gasconha, lo drama se passèt a Mercenac (Coserans), ont un òme de 60 ans, a la retirada, se seriá suicidat après aver tuat son filh d’11 ans e sa companha de 50 ans aperaquí, segon d’informacions de La Dépêche.
 
Segon los primièrs elements de l’enquèsta menada pels gendarmas, un òme nomenat Guy Rech auriá abatut sa companha e son filh amb un fusilh de caça abans de revirar l’arma contra el. Son fraire descobriguèt los còrses. Segon los pròches de las victimas s’agís d’un afar inversemblable, ja que la familha èra coneguda e aimada dins lo parçan, e degun podiá pas preveire un drama coma aqueste.
 
En la Comtat de Niça, la tragèdia se passèt a Sospèl (Val de Ròia). Segon las informacions de Nice Matin, los secorses descobriguèron diluns passat, en un ostal sus l’estrada del Còl de Brois, un enfant de cinc ans mòrt dins lo lièch al costat del còrs de son paire penjat. L’enfanton, nomenat Jules, èra escolarizat a l’escòla mairala de Sospèl e deviá retrobar sa maire dimenge de ser dins l’encastre d’una gàrdia alternada, mas lo paire lo menèt pas. Un vesin donèt l’alèrta diluns de ser en ausissent pas cap de bruch.