Lo grop de punk Pussy Riot, conegut per son activisme contra lo govèrn rus, foguèt atacat ièr per qualques policièrs a Sochi, ont se debanan los Jòcs Olimpics d’ivèrn. Las musicianas e lors amators se rescontrèron en un restaurant e en seguida avián ensajat de començar una representacion per carrièras, abilhadas amb de cagolas de colors vivas. Sul pic arribèron un dotzenat de policièrs e las agarriguèron amb de còps, de borradas e de còps de foet. Un activista de Pussy Riot lo feriguèron a la cara.
 
Diluns arrestèron ja doas de las principalas integrantas del grop, Mariia Aliokhina e Nadezhda Tolokonnikova, e cinc activistas de mai, acusats d’aver panat quicòm dins una ostalariá, mentre que se passejavan en vila. Qualques oras puèi los liberèron.
 
Aliokhina e Tolokonnikova foguèron ja indultadas fa dos meses en seguida d’una amnestia massissa que ne beneficièt tanben l’èx-magnat multimilionari Mikhaïl Khodorkovskii, e que s’interpretèt coma una operacion d’imatge de Putin abans lo començament dels Jòcs Olimpics de Sochi.