Bandièra01 1180x150: Comuna de Tolosa

Actualitats

Los amazighs e los tobos boicòtan l’Assemblada Constituenta de Libia

Las eleccions en Libia se debanèron dijòus passat

| Luca Galuzzi
Dimècres passat, 19 de febrièr, un jorn abans las eleccions per l’Assemblada Constituenta de Libia, lo Conselh Suprèm Amazigh anoncièt que reconeisseriá pas la futura constitucion perque, çò diguèt, “nosautres reconeissèm pas los que nos reconeisson pas”, segon d’informacions de Nationalia.
 
Los amazighs de Libia planhon la representacion que Libia a donat als pòbles non arabis a aquela Assemblada, compausada per 60 elegits dont dos representats tobos, dos toarègs e dos amazighs, en considerar pas los toarègs e los amazighs coma lo meteis pòble. Lo Conselh Suprèm Amazigh, al delà, mòstra sa “decepcion” perque lo pòble amazigh contunha d’èsser exclús de la vida politica libiana, coma o foguèt jos lo govèrn de Muammar Al Qaddafi.
 
Precisament los amazighs foguèron decisius en los atacs sus Trípol, çò qu’impliquèt la casuda del govèrn de Qaddafi, e ara voldrián mai de gatges constitucionals per la reconeissença de lor libertat collectiva, la libertat d’aprene e utilizar lor lenga e de gerir lor economia amb lor òrdre public dins lor territòri.
 
Al boicòt amazigh s’i poirián apondre los tobos. L’Assemblada Nacionala Tobo protèsta tanben contra la probabla marginalizacion qu’auràn dins la nòva constitucion. Revendican d’èsser reconeguts coma pòble amb lors dreches correspondents.
 
Se presentèt a las eleccions 692 candidats, dont 14 tobos e 6 toarègs (cap d’eles amb lo nom d’amazigh). Tanben cal remarcar que 73 candidats son de femnas.
 
La jornada electorara del dijòus venguèt marcada per un clima de tension, amb almens un mòrt. La participacion foguèt fòrça bassa segon los observaires internacionals e mai s’oficialament foguèt de 45%. Aquesta setmana se sauprà los resultats e los elegits deuràn far una assemblada constituenta e definir se Libia serà un estat laïc o religiós, centralista o federal, se reconeis los dreches dels pòbles o se solament ne tolèra qualques particularitats…

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article