Bandièra01 1180x150: Comuna de Tolosa

Actualitats

Es mòrt lo guitarrista Paco de Lucía

Aguèt una crisi cardiaca quand èra en Mexic amb sa familha

Lo musician Paco de Lucía moriguèt ièr a seissanta sièis ans a causa d’una crisi cardiaca, segon çò que raportava lo jornal ABC, qu’explica que lo guitarrista èra en Mexic amb sa familha. De Lucía es estat un dels guitarristas mai vertuoses del flamenco, e a reüssit a lo fusionar amb d’estils desparièrs coma lo classic e lo jazz.
 
En 1973 publiquèt son primièr disc. En aqueles tempses l’acompanhavan de percussionistas, çò que l’alonhava del flamenco mai classic e li donava un aire innovant. En 1976, amb lo disc Almoraima, aqueriguèt la renommada internacionala. Lai fasiá un omenatge als classics e li permetèt d’èsser considerat coma un dels melhors autors de flamenco e, de fach, un dels melhors guitarristas de totes los tempses.
 
Pendent los ans 1970 faguèt un desenat d’enregistraments amb lo cantaire de flamenco Camarón de la Isla. Sa popularitat s’estendèt per tot lo Mond gràcias a las collaboracions amb de grands guitarristas coma John McLaughlin, Al Di Meola e Larry Coryell, amb lo qual experimentèt la fusion del flamenco e del jazz dins de disques tan celèbres coma Passion, Grace and Fire.



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Es una trista nòva. Me rapèli encara l'emocion que sentiguèri lo primièr còp qu'ausiguèri "Entre dos aguas". Dempuèi seguiguèri la carrièra de Paco de Lucía. se vei que los artistas tanben pòdon èsser tocats pel "burning out". Fa qualques annadas que se saupèt que los concèrts se li amolonavan e qu'èra arrendut. Òsca Paco! Segur que, ont que siás, fas lega als serafins, que sa votz arribarà pas jamai a encantar coma ta guitarra.

  • 4
  • 0

Escriu un comentari sus aqueste article