Bandièra01 1180x150: Comuna de Tolosa

Actualitats

Rugbi XIII: Lesinhan mestreja lo Capitòli

Lesinhan ganha a Tolosa (28-24)
Lesinhan ganha a Tolosa (28-24)
Dimenjada que ritz per Lesinhan que, se trufant dels pronostics, se va impausar aqueste dissabte a Tolosa. Los tolzans marcan mai d’ensags (5 contra 4) mas, en causissent d’ensacar las penalitats e en rajustant dos tombats, los Singlars de las Corbièras s’impausan 28-24 e se mòstran candidats solides a la qualificacion dirècta per las mièjas finalas. Lo quinzista Farid Sid marca sa primièra partida oficiala de XIII, jol malhòt verd e blanc, per un ensag.
 
Dimenjada que ritz per l’AS Carcassona que se torna balhar de moral e fa reprene de jogaires nafrats per s’impausar sens cap de pietat a una valenta formacion lionesa: 76-12.
 
Avinhon va ganhar a Albi 32-24, Vilanuèva daissa pas alenar Baó 62-12 e Palau s’impausa fàcia a Realmont: 76-6.
 
Dimenjada que plora per Limós que capita pas de ganhar una partida dins la pola bèla e pèrd un còp de mai: aqueste còp a Sant Estève fàcia als Dragonets: 34-20.
 
Dimenjada terribla pels Dracs: esclafats, nafrats, trepejats, umiliats a Wakefield: 32-0 a la pausa, 56-14 al final! Es mai que temps de sonar lo tòcasenh, de lançar un plan ORSEC, de montar pregar al som del Canigó!
 
Divendres qu’arriba risca d’èsser plan magre amb una novèla partida de jogar a Saint Helens, primièra amb 4 victòrias per 4 partidas! Lo president, qu’es en colèra, a demandat a sas tropas de tornar prene l’avion cap a Perpinhan, en plaça de la setmana prevista en Anglatèrra. A renovelat sa fisança als entraïnaires, mas a anonciat de sancions pels jogaires que se banhan pas lo malhòt e se sortisson pas las tripas —e lo president Guasch ne coneis un talhon, el lo patron d’una gròssa entrepresa de maselariá!—: “N’ai pro dels jogaires que s’amagan!
 
En Austràlia, lo campionat NRL a tornat prene sa volada. Dins la partida cap d’aficha, Los Pols-Roosters se revelhan los primièrs e semblan de dominar, mas los Lapinons-Rabbitohs sortisson las aurelhas, las patas e las paumas del clapièr per s’impausar 28-8. Sony Bill Williams entamena la sason amb una suspension de 3 partidas per placatge dangierós. Una primièra partida va al punt d’aur: la victòria de Melbourne a Manly: 23-22 (mentre que los perdents menavan 20-0 al cap d’un quart d’ora de jòc!).
 
Al programa de la dimenjada: Limós-Tolosa e sustot un Dragonets-Lesinhan, decisiu per las qualificacions dirèctas per las mièjas finalas; decisiu tanben lo rescontre de dissabte de vèspre Avinhon-AS Carcassona per la primièra plaça de la pola C. Son tanben al programa: Realmont-Baó e Palau-Vilanuèva (pola B), Albi-Lion (pola C).
 
 
 
 
Alan Roch 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Primièra partida en campionat NRL per Remi Casty anonciada per aqueste disssabte 15 de març :
https://www.sportchoc.tv/sport/breve/nrl/8149-casty-débutera-samedi-contre-parramatta

  • 5
  • 1

Escriu un comentari sus aqueste article