L’associacion de las regions de França publiquèt dimars passat un manifèst destinat a pesar suls debats a l’entorn de la reforma ferroviària que deu èsser votada al Parlament francés al mitan de junh.
Dimars passat, l’Associacion de la Regions de França (ARF) publiquèt un Manifèst pel Renovelament del Sistèma Ferroviari que denóncia una inflacion de còstes insostenabla dins las convencions qu’an amb la societat estatala francesa dels camins de fèrre, l’SNCF. Las regions planhon que pagan los trens mas ne son pas las proprietàrias, se baton per que los trens nòus pòscan embarcar de bicicletas e ofriscan de wi-fi, e sustot planhon d’aver de pagar, uèlhs sarrats, las facturas de mantentença de l’SNCF.
A quatre meses de l’examen del projècte de lei sus la reforma ferroviària, que deu redefinir la plaça de l’SNCF, las regions creson qu’an la legitimitat de pesar dins la redaccion del tèxt, e planhon que lo mot “region” siá pas mençonat dins aquel tèxt.
L’ARF vòl tanben dobrir las pòrtas a la concurréncia per poder fugir lo monopòli de l’SNCF. A l’ora d’ara organizan e finançan los trens regionals mas an pas cap de causida dins lor mòde d’esplecha.
En setembre passat, las regions avián ja anonciat la creacion d’una estructura entre nòu regions per prene la man sus las crompas de trens. La setmana passada, l’ARF procediguèt en una jornada a l’audicion dels grands constructors coma Alstom, Bombardier o Siemens, per çò qu’es del renovelament dels trens regionals dins lo periòde 2015-2024.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Las regions paguèron fòrça moneda per adobar las linhas que vòlon manténer (per exemple en Miègjorn-Pirenèus ambe lo plan ralh). Mas aquò's sonque per d'unas linhas. La linha entre Rodés e Severac del Castèl (dins Roergue) es dins un estat catastrofic. Mas la region Miègjorn Pirenèus balhèt pas brica de moneda per far d'òbras per aquela linha. Consequéncia: l'SNCF la vòl barrar. Tot còp (al contrari de çò escrich dins l'article ambe aquel manifèst de l'ARF), me demandi se las Region e l'SNCF van pas de cotria per decidir quinas linhas vòlon salvar o desvolopar e quinas linhas vòlon barrar ...
Si que non, dins la fòto de l'article, la legenda nos ensenha qu'es lo Cevenòl. O cesi pas pauròts. Vesèm de catenaris mentre que la linha de las Cevenas es pas electrificada (a la diferéncia de la linha de l'Aubrac). Mas son pas que de besucariás, desencusatz-me.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari