Bandièra01 1180x150: Comuna de Tolosa

Actualitats

Malàisia a confirmat que l’avion desaparegut foguèt desviat “deliberadament”

Qualqu’un desconnectèt los sistèmas de comunicacion e lo faguèt volar cap a l’oèst

| Charaka Ranasinghe
Lo primièr ministre de Malàisia, Najib Razak, confirmèt dissabte passat que i a pro d’informacions per dire que lo vòl MH370 de Malaysia Airlines, desaparegut lo 8 de març amb 239 personas a bòrd, foguèt desviat de la rota que fasiá entre Kuala Lumpur e Pequin, “deliberadament”, cap al nòrd-oèst. Segon Razak, qualqu’un desconnectèt los sistèmas de comunicacion de l’aparelh, puèi lo faguèt volar pendent qualques oras cap a l’oèst, a doas destinacions possiblas: Indonesia o ben endacòm entre Cazacstan e  Turcmenistan.
 
L’avion partiguèt de Kuala Lumpur a 00h41, segon l’ora locala, dissabte 8 de març, e deviá arribar a Pequin sièis oras mai tard, mas desapareguèt dels radars quaranta minutas après s’envolar. Lo primièr ministre diguèt aqueste dissabte passat qu’amb las nòvas donadas que ne dispausan, l’MH370 contunhèt d’emetre de senhals a un satellit fins a 8h14, segon l’ora locala.
 
“La cèrca es intrada dins una nòva fasa. Esperam qu’aquela nòva informacion nos sarre de la localizacion de l’avion”, çò diguèt lo primièr ministre. L’operacion de recèrca e salvament s’èra centrada sustot dins lo Golf de Tailàndia e dins la Mar de China Meridionala, mas ara s’agrandirà. Las autoritats de Malàisia, ara, escartan pas cap d’ipotèsi sus çò que se passèt amb l’avion, comprés la sequestracion o una error del pilòt.
 
De mai, un responsable de Malaysia Airlines a admés qu’un dels telefòns mobils dels passatgièrs de l’avion èra encara a sonar dissabte. “Avèm comunicat lo numèro a la companhiá de telecomunicacions, mas los detalhs son confidencials”, çò diguèt. 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article