Bandièra01 capçalera  1180x150: Novestivada

Actualitats

Fotbòl: Tolosa fa sa “remontada”

Tolosa fa sa “remontada”
 
Aquesta dimenjada se debanèt la 29a jornada de Liga 1, amb una confrontacion occitana au programa: Montpelhièr-Tolosa. Tot se joguèt en primier periòde, e amb lei capitanis dei doas esquipas: lo brasilier Henrique dubriguèt la marca per Bordèu, seguit quauquei minutas puei per l’ancian marselhés Hilton, qu’egalizèt per Montpelhièr. Lo resultat nul profiecha a degun puei que lei girondins passan en 9a posicion, quand lei montpelhierencs son pus qu’a 6 pichons ponchs de la zòna de relegacion e son donc pas encara sauvats.
 
Dissabte, Niça confirmèt sa bòna forma dau moment: après la victòria a Marselha de la setmana passada, s’impausèron a casa dins un dèrbi caud còntra Bastia. Bosetti marquèt en tot debut de partida e lei còrs jamai saupèron pesar dins aqueu rescòntre. Lo capitani Yannick Cahuzac e mai se faguèt expulsar davant un public niçard a 100% puei que lei suportaires de Bastia foguèron encara interdichs de se desplaçar. Niça se dona un pauc d’aire per aquesta fin de sason, es 10a.
 
La bòna operacion de la dimenjada es per Tolosa, qu’a ganhat a l’exterior. Sus lei tèrras bretonas, lei tolosans se son impausats amb dificultat 3 a 2 e passan davant Bordèu au classament. Fa 3 victòrias aderren per lo TFC qu’es ara a solament 2 ponchs de l’OM.
 
Per Marselha, lei matchs se seguisson e totei se semblan. L’OM prenguèt un sol pichon ponch a Rems, es André-Pierre Gignac qu’egalizèt a dètz minutas de la fin de la partida. Faudriá ara un vertadier miracle per veire lei marselhés sus lo pòdi de Liga 1 en 2014, e mai se Lilla s’es pas impausada a domicili còntra Nantas. Dins la Ciutat Focèa, se parla de mai en mai de la demission dau president Vincent Labrune a la fin de la sason, mentre qu’es pas encara conegut lo nom dau remplaçant de José Anigo au pòst d’entraïnaire l’an que ven.
 
Per l’enaut dau classament, ges de cambiament: Mónegue batèt Lion amb una novèla realizacion de Berbatov e París, coma totjorn, s’impausèt dins son estadi còntra un concurrent en Euròpa, Sant Estève. Ibrahimović marquèt ier de ser sei 24n e 25n gòls de la sason.
 
Lo classament a la jornada 29
 
 PlaçaEsquipasPonchs
1 París 70
2Mónegue 62
3 Lilla 53
4 Sant Estève 48
5 Lion 45
6Marselha 44
7 Rems 43
8Tolosa 42
9Bordèu 41
10Niça 37
11 Bastia 37
12 An Oriant 36
13 Gwengamp 35
14Montpelhièr 34
15 Nantas 33
16 Roazhon 31
17 Èvian 30
18 Valencianas 28
19 Sochaux 25
20 Aiacciu 15
 
 
 
L’informacion de l’estrange
 
Coneissèm ja l’identitat d’un campion nacionau europèu: s’agís de l’Olimpiakos dau Pirèu que ganha son 41n títol de Grècia après sa victòria 2 a 0 còntra Panthrakikos. Amb 18 ponchs d’avança sus lo segond, lo club atenenc es assegurat d’èstre primier. Es una polida sason per l’Olimpiakos puei qu’a tanben la possibilitat de se qualificar per lei quarts de finala de Liga dei Campions, après la victòria còntra Manchester United dins la partida anar. Au nivèu nacionau, Lo Pirèu, club preferit dei classas popularas, a un paumarés recent extraordinari: foguèt 16 còps campion aquestei 18 darriereis annadas.
 
 
 
 
Matieu Casanòva

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Emmanuèl Isopet
2.

#1 Bon article (un pauc de balon redond de temps en temps!) cal parlar de tot. Per ço qu'es de davalar en segonda division, i a mens de risca que devale una cola occitana, vist lor nombre en D1! Mas butam totjorn per eles (e lo TFC que cresi qu'es lo club que montèt lo mai sovent en D1!).

  • 4
  • 0
Vincenç Cáurs
1.

''una confrontacion occitana au programa: Montpelhièr-Tolosa''. La confrontacion occitana de la dimenjada passada èra entre Montpelhièr e BORDÈU (se jogava ièr quitament).
Çò sembla, cap d'equipa occitana daissarà pas la Liga 1 a la fin de la sason. Aquò fa veire qu'aquel espòrt es tant important coma lo rugbí en çò nòstre.

  • 5
  • 0

Escriu un comentari sus aqueste article